TALA mutindu bau keseka mwana ya bakala yai. Zina na yandi Jeremi. Yandi kele mbikudi ya ngolo ya Nzambi.

Yau kele na bamvula ya ntete ya Ntotila Jozias salaka yonso sambu na kumanisa lusambu ya biteki, Jéhovah songaka Jeremi na kuvanda mbikudi na Yandi. Kansi Jeremi tubaka nde yandi vandaka mwana ya fyoti mpi Jéhovah lakaka yandi nde Yandi tasadisa yandi.

Jeremi songaka bantu ya Israele na kusala nswalu na kubika mambu ya mbi. Yandi vandaka kutuba nde: ‘Beno sadila ve banzambi ya luvunu ya makanda yai.’ Kansi bantu ya Israele mingi vandaka kuzola lusambu ya biteki na kisika ya kuzola lusambu ya Nzambi ya kyeleka Jéhovah. Ntangu Jeremi vandaka kutuba na bantu nde Nzambi tapesa bau ndola sambu na mambu na bau ya mbi, bantu vandaka kuseka yandi ngolo kibeni.

Bamvula mingi kulutaka. Jozias fwaka mpi na nima ya bangonda tatu, mwana na yandi Joakim yingaka yandi na kimfumu. Ebuna Jeremi tubaka na bana ya Israele nde: ‘Yerusaleme tafwa kana beno balula ve bifu na beno.’ Banganga-Nzambi waka makasi, bau kangaka yandi mpi bokaka nde: ‘Inki nswa nge kele na yau na kutuba mutindu yina? Nge fwete kufwa.’ Na nima bau tubaka na bamfumu ya Israele nde: ‘Jeremi fwete fwa, sambu yandi metuba mambu ya mbi sambu na mbanza na beto.’

Inki Jeremi zolaka kusala? Mbikudi titaka ve! Na kutubaka na bau yonso, yandi tubaka nde: ‘Ikele Jéhovah metinda mono sambu na kutubila beno mambu yonso yai ya beno mewa. Kana beno balula bikalulu na beno ve, Jéhovah tafwa Yerusaleme. Kansi beno zaba mbote nde kana beno kufwa mono, beno tafwa muntu mekonda kusala dikambu.’

Bamfumu bikaka yandi, kansi bana ya Israele kubalulaka ve bikalulu na bau. Na nima, Nebukadenezar, ntotila ya Babilone kwisaka kunwanisa Yerusaleme. Yandi nungaka bantu ya Israele, mpi bau kumaka bansadi na yandi. Yandi nataka bau mingi na Babilone. Yindula fyoti kana mawa ya nki mutindu beno zolaka kuvanda na yau kana bau nataka beno na kingolo-ngolo na nsi ya nzenza!