TOFAWƆ waŋnda haa laŋunɔɔ hoo mamɔɔ. A sina pa wana o cho wo? Chɛlimaya cho hoo ni. Wana suaa le Mɛlɛka wo o cho ni.

Mi Jɛhowa dimul Chɛlimaya le mbo wa wana ndɔ suaa. Mi Chɛlimaya dimi maa o cho wɔ bɔɔ o pɔmbɔ le waa wana ndɔ suaa. Kɛ mi Jɛhowa dimul ndu maa O cho ndu mala. Hei yɔŋnuŋ teleŋ masaa Chosaya kandu piɔmnda pesio o lɛŋnde leŋ niŋndo.

Mi Chɛlimaya dimul waŋnda le ma mal sɔɔŋ wɔɔŋndoŋ tosaa. Mbo dimi aa: ‘Mɛlɛkaa lachoowaa kposoŋ waŋnda haa cho sooloo ni.’ Yɔŋi nda piɛi Jɛhowa Mɛlɛka tonyaa, mi Isɔluɛitiiyaa bɔɔ bɔɔ muliŋ piɔmnda sooloo. Mɛɛ Chɛlimaya dimul waŋnda haa maa Mɛlɛka cho nda hunɔɔ nyɛ palaa tuisi choo le dɛnɛ nda wɔɔŋndo, mamɔɔ pɛŋ nda muliŋ ndu ni.

Mɛɛ wɔsilaŋ la hiou tiŋ sii, mi Chosaya wu. Mɛɛ paŋgoŋ hiou ŋgaa o piɔm ndɔɔ kɔɔli, mi Chɛhoakim po ndɔ sul masa. Chɛlimaya wa tuŋ hiouwɔɔ lachi a waŋnda dimullo aa: ‘Te la mel dɛnɛ nya wɔɔŋndo le, Chulusalɛm nɔ le tambei sɔlaa.’ Okoŋ mi wanaa soliaa salaa kpuuwa Chɛlimaya a deŋio choo choo kpeleŋ aa: ‘Diyɔɔ naŋ cho num ni pɛ le diomnda ŋcho laŋ soliŋndo o sondolaŋ.’ Okoŋ ma dimul chuaa masaa Isɔluɛi aa: ‘Chɛlimaya nɔ mbo sɔla piɔmndo, kanifuule o dimi sɔɔŋ kpundɔŋ a chiee naa hoo okɔɔ.’

Yɛɛ Chɛlimaya nɔ yɛ niko mbo tosa? O nɔ isiooŋ te. Mɛɛ mbo dimul nda aa: ‘Jɛhowa vem ya sɔɔŋ muŋ nya dimul ni. Te la mel yɔŋnda nyala wɔɔŋndaŋ te, Jɛhowa cho Chulusalɛm tɛɛmbuu. Kɛ la kɛsiŋ hei o kɔl maa te la dii ya pɛ, mɛɛ wana tosa suɛi wɔɔŋ too nya dii naa ndoo.’

Mɛɛ Chɛlimaya chii sɔɔŋ muŋ dimi kpou, ma mal ndu, a dii lɛ ndu le, kɛ Isɔluɛitiiya siŋgaŋ te. Okoŋ kɔɔli, mi Nɛbukanɛɛsa, masaa Babilɔŋ huŋ del Chulusalɛm choo a chɔulabaa. O mɛɛlulaŋ kpɔŋ, mi Nɛbukanɛɛsa siiŋguu Isɔluɛitiiya chiaa nduaa. Mbo kua a waŋnda waalaŋ o waalaŋ niŋ Babilɔŋ. A naŋ pa kɔl le mi wana ŋ sina paale pilɛ bɛɛ loo soli num o numndo chiee, mbo kuɛ a num o lɛŋnde ŋ sina paale pilɛ bɛɛ leŋ niŋ!