ပူ ၇၄
ပှၤလၢအပျံၤတၢ်သ့တဂၤ အဂ့ၢ်
ကွၢ်သးစၢ်တဂၤအံၤလၢ ပှၤတဖၣ်နံၤဘၣ်ဖၣ်လဲအီၤဒီး ဒုၣ်ဒွဲၣ်အီၤန့ၣ်တက့ၢ်. အဝဲမ့ၢ်မတၤလဲၣ်န့ၣ် သုသ့ၣ်ညါဧါ. အဝဲမ့ၢ်ယံးရမံယၤလီၤ. အဝဲမ့ၢ်ယဟိဝၤအဝံတဂၤလၢ အကါဒိၣ်ဝဲနးမးန့ၣ်လီၤ.
စီၤပၤယိၤၡံယၤ စးထီၣ်မၤဟးဂီၤဒီးသုးကွံာ် တၢ်ဂီၤတၢ်ဖီၣ်လၢ ထံဧိၤကီၢ်ဧိၤအပူၤဝံၤတယံာ်ဘၣ်ဒီး ယဟိဝၤမၢယံးရမံယၤလၢ ကကဲအဝံန့ၣ်လီၤ. ဘၣ်ဆၣ်သနာ်က့ ယံးရမံယၤတခီ ဆိကမိၣ်လီၤအသးလၢ အဆံးဒံးဒိၣ်မးလၢ ကမၤဝံအဂီၢ်န့ၣ်လီၤ. ဘၣ်ဆၣ်သနာ်က့ ယဟိဝၤစံးဘၣ်အီၤလၢ အကမၤစၢၤအီၤန့ၣ်လီၤ.
ယံးရမံယၤစံးဘၣ် ပှၤအံၣ်စရ့လးဖိတဖၣ်လၢ ကဆိကတီၢ်မၤတၢ်အၢန့ၣ်လီၤ. ဒီးစံးဘၣ်အဝဲသ့ၣ်လၢ ‘ယွၤလၢပှၤကလုာ်အဂၤဘါအီၤတဖၣ်န့ၣ် မ့ၢ်ယွၤလၢအကမူၤကမၣ်တဖၣ်လီၤ.’ ဘၣ်ဆၣ်သနာ်က့ ပှၤအံၣ်စရ့လးဖိလၢအအါတဖၣ်န့ၣ် အဲၣ်ဒိးဘူၣ်ထီၣ်ဘါထီၣ် တၢ်ဂီၤတၢ်ဖီၣ် အါန့ၢ် ယွၤလၢအမ့ၢ်အတီ ယဟိဝၤန့ၣ်လီၤ. ဖဲယံးရမံယၤစံးဘၣ်အဝဲသ့ၣ်လၢ အမၤတၢ်အၢတဖၣ်အဃိ ယွၤကမၤဟးဂီၤအဝဲသ့ၣ်အခါ အဝဲသ့ၣ်နံၤဘၣ်အီၤန့ၣ်လီၤ.
အနံၤတဖၣ် အလါတဖၣ် လဲၤပူၤကွံာ်တ့ၢ်ဝဲလံ. ယိၤၡံယၤသံယံာ်သၢလါဝံၤဒီး အဖိခွါယဟိၤယါကံၣ် ဟဲကဲထီၣ်စီၤပၤ လၢအလီၢ်န့ၣ်လီၤ. ယံးရမံယၤ ဟ့ၣ်ပလီၢ်ကဒီးအဝဲသ့ၣ် ‘သုမ့ၢ်တဆိကတီၢ် သုတၢ်မၤလၢအအၢတဖၣ်န့ၣ် ဝ့ၢ်ယရူၤၡလ့ၣ် ကဘၣ်ဟးဂီၤဝဲဒၣ်လီၤ’ န့ၣ်လီၤ. ပှၤလုၢ်တၢ်အခိၣ်တဖၣ် ဖီၣ်ယံးရမံယၤဝံၤ ကိးပသူထီၣ်ဝဲသ့ၣ်ဒီးစံး ‘လၢနကတိၤတၢ် ဒ်အံၤသိးအဃိ ပကဘၣ်မၤသံနၤလီၤ.’ အဝဲသ့ၣ် စံးဘၣ်စ့ၢ်ကီး အံၣ်စရ့လးစီၤပၤဖိခွါတဖၣ်လၢ ‘ယံးရမံယၤကတိၤထီဒါ ပဝ့ၢ်ခိၣ်အဃိ အဝဲကြၢးဘၣ်တၢ်မၤသံအီၤလီၤ’ န့ၣ်လီၤ.
ခဲအံၤ ယံးရမံယၤ ကမၤဝဲဒၣ်မနုၤလဲၣ်. အဝဲတပျံၤတၢ်ဘၣ်. တဲဘၣ်အဝဲသ့ၣ်ခဲလၢာ်ဒ်အံၤန့ၣ်လီၤ. ‘ယဟိဝၤမၢလီၤယၤလၢ ယဘၣ်တဲဘၣ်သု တၢ်တဖၣ်အံၤလီၤ. သုမ့ၢ်တညိကွံာ် သုတၢ်အၢတၢ်သီတဖၣ်သၢပျၢၤ ယဟိဝၤကမၤဟးဂီၤ ဝ့ၢ်ယရူၤၡလ့ၣ်န့ၣ်လီၤ. ဘၣ်ဆၣ် တၢ်လၢသုကဘၣ်သ့ၣ်ညါသပှၢ်ကတၢၢ်တမံၤန့ၣ် သုမ့ၢ်မၤသံယၤသၢပျၢၤ ကမ့ၢ်ဒၣ် သုမၤသံပှၤတဂၤလၢ အတၢ်ဒဲးဘးတအိၣ်န့ၣ်လီၤ.’
စီၤပၤဖိခွါတဖၣ် ပျဲပူၤဝဲယံးရမံယၤအသးသမူန့ၣ်လီၤ. ဘၣ်ဆၣ်သနာ်က့ ပှၤအံၣ်စရ့လးဖိတဖၣ်န့ၣ် တဆီတလဲအသးဘၣ်. မၤဒၣ်တၢ်အၢတဖၣ်ဒံးန့ၣ်လီၤ. လၢခံန့ၣ် ဘၤဘူၤလိၣ်အစီၤပၤ နဘူၤကးန့စၢ် ဟဲဒုးဝဲဒၣ်ဝ့ၢ်ယရူၤၡလ့ၣ်န့ၣ်လီၤ. အကတၢၢ်န့ၣ် နဘူၤကးန့စၢ် ဒုးကဲထီၣ်ပှၤအံၣ်စရ့လးဖိတဖၣ်လၢ အကုၢ်န့ၣ်လီၤ. က့ၤဖီၣ်ဝဲဒၣ် ပှၤလၢအကထိဒီးအကလးန့ၣ်ဆူ ဝ့ၢ်ဘၤဘူၤလိၣ်န့ၣ်လီၤ. ကွၢ်ဆိကမိၣ်တက့ၢ်. ပှၤတကလုာ်လၢပတသ့ၣ်ညါအီၤ မ့ၢ်က့ၤကိးပှၤဆူ ထံကီၢ်လၢပတလဲၤတုၤ နီတဘျီန့ၣ် ကမၤသးဒ်လဲၣ်.
