Esimwititi 74: Mugara gokupira woma
TARA vantu ava vana kuzora mugaragona ogu. Ono diva asi yige yilye? Ogu kuna kara Jeremiya. Age muporofete gwaKarunga gomulyo unene.
Konyima tupu zosiruwogona kutunda apa hompa Josiya ga tamekere kuzonagura mafano goyikarunga mosirongo, Jehova ta tantere Jeremiya a kare muporofete Gwendi. Nye Jeremiya ta gazara asi age simpe munona unene mokuvhura kukara muporofete. Nye Jehova ta tanta asi Age nga mu vatera.
Jeremiya ta tantere Vaisraeli va hageke kurugana yininke yoyidona. Age ta tanta asi: ‘Vakarunga ava ava karere vantu wonomuhoko vakarunga woyimpempa.’ Nye Vaisraeli wovanzi ngava panda kukarera mafano goyikarunga montambo zokukarera Karunga gosili Jehova. Jeremiya apa ana kuvatantera vantu asi Karunga nga va futisa koudona wawo, awo tava mu zoro.
Nomvhura tadi piti po. Josiya ta fu, ano konyima zomakwedi gatatu munwendi gomugara Jehoyakimu ta kara hompa. Jeremiya ta twikire kutantera vantu asi: ‘Jerusarema ngava zi zonagura po nsene kapi muna kupirura nonkedi deni donondona.’ Vapristeli tava kwata Jeremiya nokumukarukira asi: ‘Ove wa fira kukudipaga morwa yininke eyi ono kuuyunga.’ Tava tantere vagendesi vaIsraeli asi: ‘Jeremiya va kona kumudipaga, morwa age kuna uyunga ekondjeso lyositata setu.’
Yinke nye na rugana Jeremiya ngesi? Age kapi ana kara nowoma! Ta va tantere navenye asi: ‘Jehova kuna tumu nge ni ya uyunge none yininke eyi. Nsene kapi muna kupirura mparukiso zeni zondona, Jehova nga zonagura Jerusarema. Nye kareni muna si diva asi: Nsene tomu dipaga nge, one tomu dipaga mugara ogu ga pira nzo.’
Vagendesi tava sigi Jeremiya a paruke, nye Vaisraeli kapi vana kurundurura nonkedi dawo donondona. Konyima Nebukadenesara, hompa gwaBabironi, ta wiza a ya rwise Jerusarema. Mouhura, Nebukadenesara ta ninki Vaisraeli va kare vakareli vendi. Mayovi gomanzi ta twara koBabironi. Ligazadara ko tupu asi ngapi omu ya kara yokukutwara vageni koure nembo lyeni o ze kosirongo sougeni!
Jeremiya 1:1-8; 10:1-5; 26:1-16; 2 Vahompa 24:1-17.
Mapuro
- Yilye ogu mugaragona mefano?
- Yinke ana gazara Jeremiya kuhamena kukara muporofete, nye yisinke ana mu tantere Jehova?
- Mbudi musinke ana kutwikira Jeremiya kutantera vantu?
- Ngapi omu vana kuhetekera vapristeli kuhagekesa Jeremiya, nye ngapi omu ana kulikida asi age kwato woma?
- Yinke yina horoka apa Vaisraeli kapi vana rundurura nonkedi dawo donondona?
Mapuro gokugwederera ko
- Resa Jeremiya 1:1-8.
Moomu sina yi likida sihonena saJeremiya, yinke ayi ninkisa muntu a wapere mosirugana saJehova?
Ekorangedo musinke asi gava sihonena saJeremiya kovadinkantu woVakriste naina?
- Resa Jeremiya 10:1-5.
Sifanekeso musinke sononkondo ana kuruganesa Jeremiya mokulikida epiromulyo lyokuhuguvara moyikarunga?
- Resa Jeremiya 26:1-16.
Mpangera zaJehova kwaJeremiya asi “nokusiga ko si nampili kamwe,” ngapi omu yihupwa yovagwavekwa va zi tura komutjima pokudivisa mbudi zerondoro naina?
Sihonena musinke sosiwa ga gava Jeremiya koNombangi daJehova naina mediviso lyerondoro lyaJehova konomuhoko?
- Resa 2 Vahompa 24:1-17.
Yitundwamo musinke yoyidona ya tundire mo moudili ulimburukwi waJuda kwaJehova?
