Icisimicisyo 74: Umwalalume Uutatiinapo
BONA abantu balukuseka uyu musankwa umwanice. Kani ulimwisi? Ni Jelemiya. Wakusimika umucindeme uwa baLesa.
Mu mpindi inini panuma Imfumu Josaya yatatika ukonala ifibumbwabumbwa mu calo, baYehoba babula Jelemiya ukuba uwakusimika wabo. Nangabe’fyo, Jelemiya alukulanguluka ati mwanice makosa ukuba uwakusimika. Pano baYehoba balabila ati Bo bakamofwa.
Jelemiya abula abaIsilaeli ukuleka ukucite’fintu ifibipile. Alabila ati: ‘Tulesa utu abena fyalo bapempela twa bufi.’ Pano abaIsilaeli abengi basalapo ukupempela ifibumbwabumbwa ukucila baLesa bacine baYehoba. Ili Jelemiya abula abantu ati baLesa bakabapanika pa fyakubifya fyabo, balukumuseka lukoso.
Imyaka yapita. Josaya afwa, kabili panuma ya myensi itatu Jeyoyacimu umwana wakwe aba imfumu. Jelemiya atwalilila ukubula abantu ati: ‘Jelusalemi akonalwa kani tamwalwile insila syenu isibipile.’ Abapapatilisi baikata Jelemiya ne kubilikisya ati: ‘Ulyelelwe ukufwa pakuti walabila ifi fintu.’ Eli babula ifileme fya baIsilaeli ati: ‘Jelemiya alyelelwe ukufwa, pakuti alabila ifyakulwisya umusi wesu.’
Mba findo Jelemiya akucita? Talukutina! Abula bonse ati: ‘BaYehoba baalintumine ati ndabile ifi fintu kuli mwebo. Kani tamwalwile insila sya bwikasi bwenu isibipile, baYehoba bakonala Jelusalemi. Pano mwisibe icinenene ici: Kani munjipaye, mulukwipayo’muntu uutabifisyepo.’
Ifileme fyamuleka Jelemiya ukuba ne mweo, pano abaIsilaeli tabalwile insila syabo isibipile. Mukukonkapo Nebukadinesa, imfumu ya ku Babiloni, yaisa ne kulwisya Jelusalemi. Mukupelako Nebukadinesa acita abaIsilaeli ukuba abasya bakwe. Apinta amasausande aengi ku Babiloni. Ucalakanye ifi cingaba ukupintwa ku bantu abatawisi ukukufumya kwenu ukukutwala ku calo icensu!
Jelemiya 1:1-8; 10:1-5; 26:1-16; 2 Imfumu 24:1-17.
Ifyakwipusya
- Kani umwalalume uuli mu cikope ninani?
- Kani Jelemiya alanguluke’ndo pakuba uwakusimika, pano nifindo baLesa bamubula?
- Mba nifindo Jelemiya atwalilila ukubula abantu?
- Kani abapapatilisi baesya syani ukumukanya Jelemiya, pano alangisya syani ati talukutinapo?
- Mba nifindo fyacitika ili abaIsilaeli tabalukwalula imibelo yabo iibipile?
Ifyakwipusya na fimbi
- Pendeni Jelemiya 1:1-8.
Koti nifyefyo icakubwenako cakwe Jelemiya cilangisya, kani nifindo ifyelelwe ku muntu ukucita pa kupyungila baYehoba? (2 Kol. 3:5, 6)
Kani icakubwenako cakwe Jelemiya cilakosya syani abanike muli bulelo? (Ifisi. 12:1; 1 Tim. 4:12)
- Pendeni Jelemiya 10:1-5.
Kani Jelemiya alangilila syani ukweba’ti ukucetekele’fibumbwabumbwa kwa lukoso? (Jele. 10:5; Yisa. 46:7; Abaku. 2:19)
- Pendeni Jelemiya 26:1-16.
Ili balukucenjesya abantu muli bulelo, kani abasyelepo abasufisiwe balalonda syani ifi baYehoba bakomekele kuli Jelemiya ati ‘tekusyapo neli lisiwi limo’? (Jele. 26:2; Ndute. 4:2; Cit. 20:27)
Kani Jelemiya alipele syani icakubwenako iciweme kuli Bamboni sya baYehoba muli bulelo ili balukutulisya ifya kucenjesya fya baYehoba ku mikoka yonse? (Jele. 26:8, 12, 14, 15; 2 Tim. 4:1-5)
- Pendeni 2 Imfumu 24:1-17.
Mba nifindo ifibipile ifyacitikile pakuti Juda taumfwililepo baYehoba? (2 Imf. 24:2-4, 14)
