Chihande 74

Lunga Wakuhona Woma

TALA vatu vanakusekeleka ou mukweze. Unamwijiva tahi? Ikiye Yelemiya. Hikapolofweto kaKalunga wamulemu.

Omu vene naputuka Mwangana Yoshiya kwenyeka tuponya mulifuchi, Yehova hikulweza Yelemiya apwenga kapolofweto Kenyi. Oloze, Yelemiya nashinganyeka nge keshi kuhasa kupwa kapolofwetoko mwomwo achili kanyike. Oloze Yehova ngwenyi mwamukafwako.

Yelemiya mwakanyisa vaIsalele kulinga vyuma vyavipi. Ngwenyi: ‘Tulunga valemesa vatu vaka-mafuchi eka vapwa vamakuli.’ Oloze vaIsalele vavavulu kavate kulemesa Kalunga wamuchano, Yehova, shina tuponya. Omu Yelemiya mwalweza vatu ngwenyi Kalunga mwavazangamisa haupi wavo, vakivo hikumuseha.

Myaka chiyihita. Yoshiya hikufwa, kahomu hanahichi tukweji vatatu mwanenyi Yehoyakime himwamuswana. Yelemiya chavalweza lika vatu ngwenyi: ‘Yelusalema navayenyeka nge namukana kumbila vilinga vyenu vyavipi.’ Vapilishitu vamukwachile Yelemiya nakuvilika ngwavo: ‘Watela kufwa hakuhanjika vyumevi.’ Jino hinavalweza navamyata javaIsalele ngwavo: ‘Yelemiya atela kufwa, mwomwo nambulula vyakwenyeka nganda yetu.’

Yelemiya jino mwalinga muka? Ikiye kuchikima chiku! Himwavalweza vosena ngwenyi: ‘Yehova ikiye nangutumu kwiza nakumyambulwila vyuma kana. Nge kamute kuseza jijila jenu jajipi, Yehova mwenyeka Yelusalema. Oloze tachikizenu ngwenu: Nge namungujiha, kaha munakujiha mutu wakuhona mulonga.’

Vamyata hikumwecha Yelemiya, oloze vaIsalele kwecha jijila javo jakuhenga chiku. Jino, mwangana waMbavilone, Nevukataneza, mweza nakulyasa jita naYelusalema. Kutwala muze, Nevukataneza hikuvatenga vaIsalele vangamba jenyi. Vavavulu hikuvatwala kuMbavilone. Achishinganyeka kaha omu chapwa hakukumbata mulifuchi lyove kuvatu veka nakukutwala kulifuchi lyaungeji!

Yelemiya 1:1-8; 10:1-5; 26:1-16; Vamyangana 2, 24:1-17.