Se tlakatl tlen amo omomojtiaya
TLAPOUALISTLI 74
Se tlakatl tlen amo omomojtiaya
XIKINMITA tlaltikpaktlakamej tlen kiuejuetskiliaj nin telpochtli. ¿Tikmati akin nin telpochtli? Ye itoka Jeremías, se iteotlajtojki Jehová tlen miak ipati.
Seki kauitl satepan ueyi tekiua Josías opejki kinxixinia nochtin teotsitsintin, Jehová okilui Jeremías ma yeto Iteotlajtojki. Maski ijkon, Jeremías okineltokaya ye ok okatka telpochtli pampa yetoskia teotlajtojki. Maski ijkon, Jehová okilui ye kipaleuiskia.
Jeremías okinmilui israelitas ayakmo ma kichiuakan tlamantli tlen amo kuali. Okinmilui: ‘Teotsitsintin tlen oksekimej tlaltikpaktlakamej kinueyichiuaj amo melauak yoltokej’. Maski ijkon, miakej israelitas okinekiayaj kinueyichiuaskej teotsitsintin uan amo Jehová akin melauak toTajtsin Dios. Ijkuak Jeremías okinmilui toTajtsin Dios kintlajyouiltiskia pampa yejuan okichiuayaj tlen amo kuali, israelitas san okiuejuetskilijkej.
Opanokej xiuitl. Josías omikik, uan eyi metstli satepan ikone Jehoiaquim omochi ueyi tekiua. Jeremías ok okinmiluiaya israelitas: ‘Jerusalén kixpoloskej tla namejuan amo nanmoyolkuepaj’. Teopixkamej okikitskijkej Jeremías uan otsajtsikej: ‘Moneki mikis Jeremías, pampa amo kuali otlajto itech toaltepetl’.
¿Axan tlen kichiuaskia Jeremías? ¡Ye amo omomojti! Nochtin okinmilui: ‘Jehová onechtitlanki pampa ma namechmatilti ninmej tlamantli. Tla amo nankikauaj nankichiuaj tlamantli tlen amo kuali, Jehová kixpolos Jerusalén. Maski ijkon, xikmatikan nin: Tla nechmiktiskej, nankimiktiskej se tlakatl tlen amo okichi itlaj tlamantli tlen amo kuali’.
Tekiuajkej amo okimiktijkej Jeremías, maski ijkon, israelitas ok okichiuayaj tlamantli tlen amo kuali. Satepan ouala Nabucodonosor, akin okatka ueyi tekiua itech altepetl Babilonia, uan omoteui iuan Jerusalén. Saiktlami, Nabucodonosor okichi israelitas ma mochiuakan itlakeualuan. Sapanoa miakej okinuikakej itech altepetl Babilonia. ¡Ximokuayejyeko tlen tikmachiliskia tla tlaltikpaktlakamej akinmej amo tikinmixmatij mitsuikaskiaj itech se ueyi altepetl tlen amo tikixmati!
Jeremías 1:1-8; 10:1-5; 26:1-16; 2 Reyes 24:1-17.
