TALA nkene aantu taa sheke omulumentu nguka omugundjuka. Owa tseya kutya oye lye? Oye Jeremia. Oye omuprofeti gwaKalunga a simana noonkondo.

Mbala konima sho Omukwaniilwa Josia ta tameke ta hanagula po iimenka moshilongo, Jehova ota lombwele Jeremia a kale omuprofeti Gwe. Ihe Jeremia ota dhiladhila kutya ye omushona unene okukala omuprofeti. Ihe Jehova ota ti kutya Ye ote ke mu kwatha.

Jeremia ota lombwele Aaisrael ye ethe po okulonga uuwinayi. ‘Iikalunga mbyoka iigwana hayi galikana, oyo yiifundja,’ ye ta ti. Ihe Aaisrael oyendji oya hala owala ya galikane iikalunga pehala lyokugalikana Kalunga kashili Jehova. Sho Jeremia ta lombwele oshigwana kutya Kalunga ote ke shi geela molwuuwinayi washo, sho otashi mu yolo owala.

Oomvula otadhi piti po. Josia okwa si, nokonima yoomwedhi ndatu omwana Joakim ota ningi omukwaniilwa. Natango Jeremia ota lombwele oshigwana: ‘Jerusalem otashi ka hanagulwa po ngele ne itamu lundulula oondjila dheni oombwinayi.’ Aasaaseri otaa kwata Jeremia notayi igidha: ‘Ngoye ou na okudhipagwa molwiinima mbyoka to popi.’ Opo nduno taya lombwele aapangeli yaIsrael: ‘Jeremia oku na okudhipagwa, oshoka ota popi a tsa ondumbo noshilando shetu.’

Ngashingeyi Jeremia ota ka ninga nee shike? Ye iha tila! Ye ota ti kuyo: ‘Jehova oye a tumu ndje ndi mu lombwele iinima mbika. Ngele ne itamu lundulula omikalo dhonkalamwenyo yeni ombwinayi, Jehova ota ka hanagula po Jerusalem. Mwaashika ne otamu vulu okukala nuushili: Ngele otamu dhipaga ndje, ne otamu dhipaga omulumentu kee na oondjo.’

Aapangeli otaa pitika Jeremia a kale nomwenyo, ihe Aaisrael itaa lundulula omikalo dhawo omiwinayi. Konima Nebukadnesar, omukwaniilwa gwaBabilon, ote ya okukondjitha Jerusalem. Lwahugunina Nebukadnesar ota ningi Aaisrael aapiya ye. Ye ota fala omayuvi ogendji kuBabilon. Dhiladhila owala nkene tashi ka kala ngele aantu waahe ya shi taye ku kutha megumbo lyoye e taye ku fala koshilongo waa shi ko nale!