TALA ovanthu ava vekahi nokulinga omukuele omukuendye ou. Utyii olie omukuendye ou? O Jeremia. Ankho omuuli umue wakolela wa Huku.

Etyi Ohamba Josia ahimbika okuhanyauna ovilolo motyilongo, konyima Yehova wapopila Jeremia akale omuuli Wae. Anthi, Jeremia ankho wasoka okuti omututu unene pala okukala omuuli. Mahi, Yehova emupopila okuti memukuatesako.

Jeremia atolela ova Isilayeli vayekepo okulinga ovipuka ovivi. Wati: Ovanthu vovilongo vafenda ono huku mbomatutu.’ Iya ova Isilayeli ovanyingi ankho vafenda ovilolo, kavafende Yehova Huku yotyotyili. Etyi Jeremia apopila ovanthu okuti Huku mevehitisa, mokonda yovivi valinga, ovo ankho vemuyola vala.

Papita omanima, iya Josia wankhia. Etyi Josia ankhia, papita onohanyi ononthatu, omona wae Jeoiakim alingi ohamba. Jeremia atualako nokupopila ovanthu okuti: ‘Inkha kamuyekepo okulinga ovivi o Jelusalei maihanyaunuapo.’ Ono saserdote mbakuata Jeremia, iya avakaluluka okuti: ‘Ove watokala okuipawa, mokonda yovipuka ukahi nokupopia.’ Konyima avapopila ovatumini vo Isilayeli okuti: ‘Jeremia una yokuipawa. Mokonda wapopia omapita epundaumbo lietu.’

Pahe Jeremia malingi ñgeni? Jeremia kakalele nouoma. Wevetolela okuti: ‘Yehova wanthuma opo ndyimupopile ovipuka evi. Inkha kamuyekepo okulinga ovipuka ovivi momuenyo wenyi, Yehova mahanyaunapo o Jelusalei. Mahi, noñgonokei okuti: Inkha mundyipaa, mamuipaa omunthu wahalingile natyimue tyapenga.’

Ovatumini avayeke Jeremia nomuenyo. Mahi, ova Isilayeli kavayekelepo okulinga ovipuka ovivi. Konyima Nambukondonosole ohamba yo Mbambilonia, eya okulwisa o Jelusalei. Atyindi ova Isilayeli ovanyingi opo valinge ovapika vae ko Mbambilonia. Pahe soka ñgeno ovanthu wehei, vekupola meumbo liove avekutuala kotyilongo wehei, ukala ñgeni?