Relato 74: Un Hòmber sin Miedu
MIRA e hendenan tene mofa di e hóben ei. Bo sa ken e ta? Esei ta Jeremias. E ta un profeta masha importante di Dios.
Djis despues ku Rei Josias a kuminsá destruí e imágennan den e pais, Yehova a bisa Jeremias pa bira Su profeta. Sin embargo, Jeremias a kere ku e tabata muchu yòn pa ta profeta. Pero Yehova a bisa ku lo e yud’é.
Jeremias a bisa e israelitanan bandoná nan maldat. El a bisa: ‘E diosnan ku hende di e nashonnan ta adorá ta falsu.’ Pero hopi israelita a preferá di adorá imágen en bes di e Dios berdadero Yehova. Ora Jeremias a bisa e pueblo ku Dios lo kastigá nan pa nan maldat, nan a hari so.
Añanan a pasa. Josias a muri, i tres luna despues su yu hòmber Joakim a bira rei. Jeremias a sigui bisa e pueblo: ‘Yerusalèm lo ser destruí si boso no kambia di boso mal kaminda.’ E saserdotenan a gara Jeremias i a grita: ‘Mester mata bo pa e kosnan ku bo ta papia.’ Anto nan a bisa e prensnan di Israel: ‘Jeremias mester muri, pasobra e ta papia kontra nos stat.’
Kiko Jeremias a hasi awor? E no a tene miedu! El a bisa nan tur: ‘Yehova a manda mi bisa boso e kosnan ei. Si boso no kambia boso mal manera di biba, Yehova lo destruí Yerusalèm. Pero keda sigur di esaki: Si boso mata mi, boso ta mata un hende ku no a hasi nada malu.’
E prensnan a laga Jeremias na bida, pero e israelitanan no a kambia di nan mal kaminda. Despues Rei Nabukodonosor di Babilonia a bini i a bringa kontra Yerusalèm. Finalmente Nabukodonosor a hasi e israelitanan bira su esklabo. El a hiba míles di nan Babilonia. Imaginá bo kon lo bo sinti si hende straño saka bo for di bo kas i hiba bo un tera straño!
Jeremias 1:1-8; 10:1-5; 26:1-16; 2 Reinan 24:1-17.
Pregunta
- Ken e hóben riba e plachi ta?
- Kiko Jeremias a pensa tokante bira profeta, pero kiko Yehova a bis’é?
- Ki mensahe Jeremias a keda bisa e pueblo?
- Kon e saserdotenan a purba stòp Jeremias, pero kon el a demostrá ku e no tin miedu?
- Kiko a sosodé ora e israelitanan a keda sin bira for di nan mal kaminda?
Preguntanan adishonal
- Lesa Jeremias 1:1-8.
Manera e ehèmpel di Jeremias ta mustra, kiko ta kualifiká un hende pa Yehova su sirbishi? (2 Kor. 3:5, 6)
Ki animashon e ehèmpel di Jeremias ta pa hóbennan kristian awe? (Ekl. 12:1; 1 Tim. 4:12)
- Lesa Jeremias 10:1-5.
Ki ilustrashon impaktante Jeremias a usa pa mustra ku konfia den ídolo no tin sentido? (Jer. 10:5; Isa. 46:7; Hab. 2:19)
- Lesa Jeremias 26:1-16.
Kon e restu ungí a tuma na pechu e mandamentu ku Yehova a duna Jeremias pa ‘no laga ni un palabra afó,’ segun ku nan ta proklamá e mensahe di atvertensia awe? (Jer. 26:2; Deu. 4:2; Echo. 20:27)
Ki ehèmpel ekselente Jeremias a pone pa Testigunan di Yehova awe den e manera ku el a proklamá Yehova su spièrtamentu na e nashonnan? (Jer. 26:8, 12, 14, 15; 2 Tim. 4:1-5)
- Lesa 2 Reinan 24:1-17.
Ki konsekuensia tristu tabatin komo resultado di Huda su infieldat na Yehova? (2 Rei. 24:2-4, 14)