RIKË kë jövenpita asikïkaq nunakunata. ¿Piraq kë jövenqa, musyankiku? Teyta Diospa alläpa importante Jeremías shutiyoq profëtanshi.

Santokunata rey Josías ushakätsir qallëkonqanllachönash, profëtan kanampaq ninaq Jehová Jeremïasta. ‘Profeta kanäpaqqa alläpa jövenran kä,’ nishpash ninaq. ‘Pero noqam yanapashqëki,’ ninshi Jehová Diosqa.

Tsënash, ‘mana alli rurëkunataqa haqiyëna. Nacionkuna adorayanqan dioskunaqa mana alli dioskunam kayan,’ nishpash ninaq Jeremías israelïtakunata. Pero santokuna adorëtash israelïtakuna akrayashqa, manash rasumpëpa Jehová Dios adorëtatsu. ‘Mana alli rurënikikunapitam Jehová castigayäshunki,’ nishpa Jeremías niptinshi israelïtakuna asikuyänaq pëpita.

Watakuna pasariptinnash wanurinaq Josías y tsurin Jehoiaquim nishqannash rey tikrarinaq kima killa pasariptin. Pero ‘Jerusalenqa limpum ushakanqa mana alli rurënikikunata mana haqiyaptikeqa,’ nikanshi Jeremías. Tsënash, ‘wanunmanmi Jeremïasqa, markantsikpa contranmi parlashqa,’ nishpa sacerdötekuna tsarïkur qayapëkuyänaq.

¿Imataraq kananqa Jeremías ruranman? ¡Pëqa manash mantsakuntsu! ‘Kë llapanta niyänaqpaqpis Jehovämi kachamashqa. Mana alli kawënikikunata mana haqiyaptikeqa Jerusalenta Jehová ushakätsimonqam. Pero wanïkatsiyämarqa, mana ni ima mana alli ruraq nunatam wanïkatsiyanki, tsëta alleq yarpäyë,’ nishpash ninaq llapantapis.

Jeremías kawanantaqa haqiriyanshi principekuna, pero mana alli rurëkunataqa manash haqiyantsu israelïtakuna. Tsëpitanash, Jerusalenwan peleaq Babiloniapa reynin Nabucodonosor nishqan shamïkunaq. Tsënöpanash uryaqninkuna tikraratsinaq Nabucodonosor israelïtakunata. Waranqëpayanshi apakunaq markan Babiloniaman. ¡Yarpakurki! ¿Imanöraq mana reqenqëki markaman qamta apakuyäshuptiki kankiman?