QAWAY chay mozomanta runakunaqa asikuchkanku. ¿Yachankichu pitaq payqa kanman? Payqa Jeremias sutiyoq Diosmanta willakuqmi.

Juda nacionpi rey Josias taytacha-mamachakunata wischuchkaptinmi Jehová Diosqa Jeremiasta nirqa Willakuqnin kananpaq. Jeremiasñataqmi willakuq kananpaqqa warmaraq kasqanta piensarqa. Hinaptinmi Kikin Jehová Diosña yanapaqnin kananpaq nirqa.

Chaymi Jeremiasqa Israel casta runakunata mana allin rurasqankuta saqenankupaq nirqa. Nirqataqmi: ‘Huklaw nacionkunapa runankunaqa mana imapaq valeq taytachakunatam yupaychanku’ nispa. Ichaqa achkallaña Israel runakuna Jehová Diosta mana yupaychaspanku taytacha-mamachakunataña yupaycharqaku. Chaymi Jeremiasqa llaqtamasinkuna mana allinta rurasqankumanta Jehová Diospa castigarunanmanta willaptinmi, paykunaqa burlakurqaku.

Tiempopa risqanman hina Josias wañukurqa hinaptin kimsa killa qepallatam churin Joacim gobiernayta qallaykurqa. Chay tiempopi Jeremiasqa nillarqataqmi: ‘Mana kasukuspa kawsaptikichikqa kay Jerusalen llaqtapas mana runayoqñam purmanqa’ nispa. Chaymi sacerdotekunaqa Jeremiasta hapiruspanku nirqaku: ‘Kay runaqa llaqtapa contranpi rimasqanraykum wañunanpaq sentenciasqa kanan’ nispa.

¿Imatamá Jeremiasqa ruranqa? ¡Manamá payqa manchakurqachu! Hinaspanmi runakunaman nirqa: ‘Jehová Diosmi qamkunaman kachamuwarqa llapa uyarisqaykichikkunata rimanaypaq. Mana kasukuspa kawsaptikichikqa kay Jerusalen llaqtatam purmachinqa. Chaywanpas kaytayá yachaychik: Wañuchiwaspaykichikqa inocente runatam wañuchinkichik’ nispa.

Chaymi kamachikuqkunaqa Jeremiasta mana wañuchirqakuchu, Israel runakunam ichaqa mana allin rurasqankutaqa manam saqerqakuchu. Chaymantam Babilonia nacionpa reynin Nabucodonosor hamurqa Juda nacionpa contranpi peleananpaq. Hinaspanmi Nabucodonosorqa waranqantin-waranqantin Israel casta runakunata sirvientenkunaña kananpaq Babiloniaman aparqa. ¡Piensariy imaynaraq kanman mana reqsisqayki runa mana reqsisqayki nacionman aparusuptiki!