MANNOOTU konne mancho arrassitanno gara lai. Kuni manchi ayeetiro afootto? Ermiyaasiiti. Isi worba Maganu masaalaanchooti.

Iyyoosiyaasi kaphphu maganna gobbatenni gudi waro, Yihowa Ermiyaasi masaalaanchosi ikkanno gede doorisi. Ikkeennano Ermiyaasi masaalaancho ikkate lowo geeshsha ajoommo yii. Yihowa kayinni kaaˈleemmohe yiisi.

Ermiyaasino Isiraaelete gosa bunshe assa agurtanno gede kulinsa. Togo yiinsa: ‘Daga magansidhanno maganna kaphphoho.’ Ikkollana lowohu Isiraeelete manni halaalaancho Magano Yihowa agure kaphphu maganna magaˈni. Ermiyaasi Maganu bunshensara qorichchishansara kainota kulinsata mannootu osoˈlitu.

Hakkiinnino seedu diri sai. Iyyoosiyaasino reyi; isi reyihunni sasu agani gedensaanni, beettisi Iyyoaaqeemi nugusa ikki. Ermiyaasino mannaho, ‘Busha doogoˈnenni higa hoogginiro, Yerusaalame giirantanno’ yee kula diagurino. Kakkalaano Ermiyaasi amadde qoonqonsa gotti assite, ‘Konne busha qaale coyiˈrootto daafira reya hasiissannohe’ yitusi. Qolteno Isiraeelete roorrootira, ‘Ermiyaasi kataminke aana bushare coyiˈrino daafira reya hasiissannosi’ yite kultu.

Ermiyaasi xa ma assakka? Konne manna diwaajjino! Insa baalunkura, ‘Yihowa konne coye kulammoˈnera soyinoe. Busha ikkitoˈne agura hoogginiro, Yihowa Yerusaalame hunanno. Ane shitiniro kayinni, mitte bunshe assoommokkiha shitinanni heedhinoonnita affe’ yee kulinsa.

Isiraeelete roorrooti Ermiyaasi shitusikki agurtu; Isiraeele kayinni xaano bunshensa diagurtino. Yannate gedensaanni, Baabiloonete nugusi Nabukedenetsoori Yerusaalame qasara dayi. Gedensaanni Nabukedenetsoori Isiraeelete manna borojjesi assiri. Isi lowo kume manna Baabiloone adhe haˈri. Affe egennoottokki manni afoottokki gobba adhe haˈrihero hiitto ikkattoro hanni hedi!