BUKA labantfu, bahleka lelijaha. Uyalati kutsi lingubani? Ligama lalo nguJeremiya, futsi ungumphrofethi waNkulunkulu lobaluleke kakhulu.

Ngemuva kwekutsi iNkhosi Josaya icalile kuphihlita tithico eveni, Jehova watjela Jeremiya kutsi abe ngumphrofethi wakhe. Jeremiya yena abecabanga kutsi usemncane kakhulu kutsi angaba ngumphrofethi. Kodvwa Jehova wametsembisa kutsi utamsita.

Jeremiya watjela ema-Israyeli kutsi ayekele kwenta tintfo letimbi. Watsi kuwo: ‘Bonkulunkulu labakhontwa tive, babonkulunkulu bemanga.’ Kodvwa ema-Israyeli akhetsa kukhonta tithico kunekukhonta Nkulunkulu weliciniso Jehova. Kwatsi nakabatjela kutsi Nkulunkulu abetawajezisa ngenca yetento tawo letimbi, avele ameya futsi amhleka.

Kwendlula iminyaka, ekugcineni Josaya wafa, futsi ngemuva kwetinyanga letintsatfu indvodzana yakhe Jehoyakimu yaba yinkhosi esikhundleni sakhe. Jeremiya abechubeka ecwayisa bantfu atsi: ‘Naniloku ningagucuki, liJerusalema litawubhujiswa.’ Baphristi bambamba bamemeta batsi: ‘Kufanele ufe! Ngoba uphrofethe ngaloku.’ Ngako batjela tiphatsimandla taka-Israyeli batsi: ‘Jeremiya kufanele abulawe, ngoba ukhulume ngalokumelene nalelidolobha letfu.’

Abetawenta njani Jeremiya? Akazange afikelwe kwesaba. Kodvwa wakhuluma nabo bonkhe labebalapho watsi: ‘Jehova ungitfumile kutsi ngitewukhuluma letintfo lapha kini. Kodvwa naningagucuki etindleleni tenu letimbi, utalibhubhisa liJerusalema. Cinisekani nganaku: nangabe nikhetsa kungibulala, nitawube nibulala umuntfu lote licala.’

Ngako tiphatsimandla tamyekela Jeremiya, atizange timbulale. Kodvwa ema-Israyeli awazange agucuke. Ngekuhamba kwesikhatsi, Nebukhadnezari inkhosi yaseBhabhulona, yeta yatekulwa neliJerusalema. Ekugcineni, Nebukhadnezari wenta kutsi ema-Israyeli abe tisebenti takhe. Watfumba tinkhulungwane letinyenti watiyisa eBhabhulona. Ungativa njani wena nakungefika bantfu longabati ekhaya kini, bakutsatse bakuyise eveni longalati?