SIO ki he kakai ‘oku nau fakakata‘aki ‘a e tangata talavou ko ‘ení. ‘Okú ke ‘ilo pe ko hai ia? Ko Selemaia ‘eni. Ko e palōfita mahu‘inga ‘aupito ia ‘a e ‘Otuá.

‘I he hili pē ko ia ‘a e kamata ‘a Tu‘i Siosaia ke faka‘auha ‘a e ngaahi ‘aitolí mei he fonuá, na‘e fakahā ‘e Sihova kia Selemaia ke hoko ko ‘Ene palōfita. Kaekehe, na‘e fakakaukau ‘a Selemaia ia ‘okú ne fu‘u kei si‘i ke hoko ko ha palōfita. Ka na‘e pehē ‘e Sihova te Ne tokoni kiate ia.

Na‘e tala ‘e Selemaia ki he kau ‘Isilelí ke tuku ‘enau fai ‘a e ngaahi me‘a ‘oku koví. Na‘á ne pehē: ‘ ‘Oku loi ‘a e ngaahi ‘otua ‘oku lotu ki ai ‘a e kakai ‘o e ngaahi pule‘angá.’ Ka ko e kau ‘Isileli tokolahi na‘a nau sai‘ia ange ‘i he‘enau lotu ki he ngaahi ‘aitolí ‘i ha‘anau lotu ki he ‘Otua mo‘oni ko Sihová. ‘I hono fakahā ‘e Selemaia ki he kakaí ‘e tautea kinautolu ‘e he ‘Otuá koe‘uhi ko ‘enau ngaahi faikoví, na‘a nau kata‘i pē ia.

Na‘e ‘osi atu ha ngaahi ta‘u. Na‘e mate ‘a Siosaia, pea ‘i he ‘osi mei ai ha māhina ‘e tolu na‘e hoko hono foha ko Sihoiakimí ko e tu‘i. Na‘e kei hoko atu pē hono tala ‘e Selemaia ki he kakaí: ‘ ‘E faka‘auha ‘a Selusalema ‘o kapau ‘e ‘ikai te mou liliu ho‘omou ngaahi founga koví.’ Na‘e puke ‘e he kau taula‘eikí ‘a Selemaia mo nau kaila: ‘ ‘Oku totonu ke tāmate‘i koe ‘i ho‘o lea‘aki ‘a e ngaahi me‘a ko ‘ení.’ Pea nau tala ki he kau pilinisi ‘o ‘Isilelí: ‘ ‘Oku totonu ke tāmate‘i ‘a Selemaia, he kuó ne tala ‘e faka‘auha hotau koló.’

Ko e hā ‘a e me‘a na‘e toki fai ‘e Selemaiá? Na‘e ‘ikai ke ilifia ia! Na‘á ne tala kiate kinautolu hono kotoa: ‘⁠Ko e fekau mai au ‘e Sihova ke u lea‘aki ‘a e ngaahi me‘a ko ‘ení kiate kimoutolu. Kapau ‘e ‘ikai te mou liliu ho‘omou ngaahi founga koví, ‘e faka‘auha ‘e Sihova ‘a Selusalema. Ka ke mou ‘ilo ‘a e me‘a ko ‘ení: Kapau te mou tāmate‘i au, ko ho‘omou tāmate‘i ia ha tangata kuo ‘ikai te ne fai ha hala.’

Na‘e tuku ‘e he kau pilinisí ‘a Selemaia ke mo‘ui pē, ka na‘e ‘ikai ke liliu ‘a e kau ‘Isilelí mei he‘enau ngaahi founga koví. Ki mui mai ai, na‘e ha‘u ‘a Nepukanesa, ko e tu‘i ‘o Pāpiloné, ‘o tau‘i ‘a Selusalema. Pea na‘e ‘ai leva ‘e Nepukanesa ‘a e kau ‘Isilelí ko ‘ene kau sevāniti. Na‘á ne ‘ave ‘a e toko laui afe ki Pāpilone. Fakakaukau ange pe te ke ongo‘i fēfē ‘i hano ‘ave koe ‘e ha kakai kehe mei ho fonuá ki ha fonua kehe!