KʼELA jastal wane stseʼlajel ja winik it. ¿Wan maʼ xa naʼa machunkiluk? Sbʼiʼil Jeremías, ja yeʼn jun aluman bʼa Dyos jel tʼilan.

Tʼusan tsaʼan yajni ja mandaranum Josías kʼe xchʼaysnajel ja bʼa chonabʼi ja kʼulubʼal dyosiki, Jyoba yala yabʼ ja Jeremiasi aʼoch yaluman. Pe ja Jeremías wa spensaraʼan jelto kerem bʼa jun aʼtel jastal jaw. Jyoba yala yabʼ ojni skoltaʼa.

Jeremías yala yabʼ ja israʼelenyo ayaʼekan skʼulajel ja jastik junuk bʼa mi lekuki, yala: «Ja dyosik wa xyaʼteltaye ja ixuk winiki mini meran dyosukeʼa». Pe jitsan jani wa stsaʼawe yaʼteltajel ja kʼulubʼal dyosiki sok mi jaʼuk ja Jyoba, ja Dyos smeranili. Yajni Jeremías yala yabʼ ja ixuk winik ja Dyosi ojni ya chʼaysnajele yuja mi lekuk ja jastik wa skʼulaneʼi, ja yeʼnleʼi kʼe stseʼlaye ja Jeremías.

Ekʼa jabʼiliki, soka Josiasi chami. Oxe ixaw tsaʼan, ja skerem Jehoiaquim yeʼnxa ochkan slokʼol. Jeremías wani yaljel yabʼ ekʼ ja ixuk winiki: «Ojni ajuk chʼayuk snajel ja Jerusalén ta mixa tukbʼesex ja wa modoʼexi». Ja olomalik bʼa templo snolkʼabʼine ja Jeremías sok awaniye yaljel: «Ja Jeremías tʼilani oj chamuka kʼumanita sbʼaj mi lekuk ja chonabʼi».

¿Jas maʼ oj skʼuluk ja Jeremías ja yan? ¡Ja yeʼn mini tʼun xiwi! Yala yabʼye: «Yeʼnani ja Jyoba ja maʼ sjekonejon bʼa oj kalawabʼyex ja jastik junuk it. Ta mixa tukbʼesex ja modoʼexi, ja yeʼn ojni xchʼaysnajel ja Jerusalén. Pe ojni anaʼex ja it: ta milawonex, waxa milawex jun winik bʼa mini jas mi lekuk skʼulunejuk».

Ja matik ay xcholi mi smilawe ja Jeremiasi, pe ja israʼelenyo mini yaʼawekan skʼulajel ja jastik mi lekuki. Tsaʼan ja Nabucodonosor, ja mandaranum bʼa Babilonia, jak bʼa oj tiroʼanuke smok, ya och smosoʼe ja israʼelenyo sok jitsan mil ijiye och man Babilonia. ¡Jel maʼ tuk ja lek la iji och bʼa jun chonabʼ mi awilojuk yuj winike mixa naʼa sbʼaj!