قاراڭ، كۆپچىلىك بىر ياش يىگىتنى زاڭلىق قىلىپ كۈلۈۋاتىدۇ. بىلەمسىز، ئۇ كىم؟ ئۇ يىگىت يەرەمىيا، خۇدانىڭ بەك مۇھىم بىر پەيغەمبىرى.

يوشىيە دۆلەت ئىچىدىكى بۇتلارنى ۋەيران قىلىشقا باشلاپ ئۇزۇن ئۆتمەي، يەھۋا يەرەمىيانى پەيغەمبەرلىك قىلىشقا بۇيرۇدى. يەرەمىيا ئۆزىنى تېخى بەك ياش، پەيغەمبەرلىك قىلالمايمەن، دەپ ئويلىغانىدى. بىراق، يەھۋا ئۇنىڭغا ياردەم بېرىدىغانلىقىنى ئېيتتى.

يەرەمىيا پەيغەمبەر ئىسرائىللارغا يامان ئىش قىلىشنى توختىتىشنى ئېيتىپ، «يات مىللەتلەر ئىبادەت قىلىدىغان ئىلاھلار، يالغان خۇدالار»، دېدى. بىراق، نۇرغۇن ئىسرائىللار ھەق خۇدا يەھۋاغا ئىبادەت قىلماي، ئەكسىچە بۇتلارغا ئىبادەت قىلىشتى. يەرەمىيا خەلقنىڭ قىلغان يامان ئىشلىرى ئۈچۈن، خۇدانىڭ ئۇلارنى جازالايدىغانلىقىنى ئېيتتى. ئەمما، كۆپچىلىك ئۇنى زاڭلىق قىلىپ كۈلۈشتى.

يىللار ئۆتۈپ، يوشىيە ئۆلۈپ كەتتى. ئۈچ ئايدىن كېيىن، ئۇنىڭ ئوغلى يەھۇياقىم پادىشاھ بولدى. يەرەمىيا پەيغەمبەر داۋاملىق خەلققە:‏ «ئەگەر يامان يولدىن يانمىساڭلار، يېرۇسالېم خاراب قىلىنىدۇ»، دېدى. روھانىيلار يەرەمىيانى تۇتۇپ، «مۇشۇ گەپلەرنى قىلغىنىڭ ئۈچۈن، سەن چوقۇم ئۆلتۈرۈلىسەن»، دەپ ۋارقىراشتى. شۇنىڭ بىلەن، ئۇلار ئىسرائىلنىڭ ئەمەلدارلىرىغا:‏ «يەرەمىيا ئۆلتۈرۈلسۇن، چۈنكى ئۇ شەھىرىمىزگە ھاقارەت قىلدى»، دېدى.

ئەمدى يەرەمىيا نېمە قىلماقچى؟ ئۇ قورقمىدى. ئۇ كۆپچىلىككە:‏ «يەھۋا بۇلارنى سىلەرگە ئېيتىشقا مېنى ئەۋەتتى. ئەگەر سىلەر بۇنداق رەزىل تۇرمۇش كەچۈرۈش يولۇڭلارنى ئۆزگەرتمىسەڭلار، يەھۋا يېرۇسالېمنى خاراب قىلىدۇ. ئەمما شۇنى بىلىپ قويۇڭلاركى، ئەگەر مېنى ئۆلتۈرسەڭلار، سىلەر بىگۇناھ بىر ئادەمنى ئۆلتۈرگەن بولىسىلەر»، دېدى.

گەرچە ئەمەلدارلار يەرەمىيا پەيغەمبەرنى قويۇپ بەرگەن بولسىمۇ، ئەمما ئىسرائىل خەلقى ئۆزگەرمەي، داۋاملىق يامان يولىدا مېڭىۋەردى. كېيىن، بابىلون پادىشاھى نەبۇكەدنەسەر يېرۇسالېمغا ھۇجۇم قىلىپ كەلدى. ئاخىرىدا نەبۇكەدنەسەر ئىسرائىل خەلقىنى ئۆزىنىڭ قۇلى قىلدى. ئويلاپ كۆرۈڭ، يات بىر مىللەت سىزنى يۇرتىڭىزدىن ئېلىپ كېتىپ، باشقا بىر دۆلەتكە ئېلىپ بارسا، قانداق ھېسسىياتقا كېلىسىز!

يەرەمىيا 1:‏1-‏8؛ 10:‏1-‏5؛ 26:‏1-‏16؛ 2-‏پادىشاھلار 24:‏1-‏17.