TALA ndomo omanu va kasi loku sepula umalẽhe u. Ove hẽ wa kũlĩha umalẽhe waco? Onduko yaye Yeremiya. Eye wa kala uprofeto wa Suku.

Eci Soma Yosiya a fetika oku nyõla oviñumañuma vofeka, Yehova wa sapuila Yeremiya oco a kale uprofeto Waye. Pole, Yeremiya wa limbuka okuti eye wa kala enene umalẽhe koku kala uprofeto. Kuenje Yehova wa likuminyile oku u kuatisa.

Yeremiya wa sapuila va Isareli oco va liwekepo oku linga eci cĩvi. Eye wa va sapuila okuti va kasi loku fendela olosuku viesanda. Momo va Isareli va velisilepo calua oku fendela oviteka okuti, oku fendela Yehova Suku ci sule. Omo liaco, Yeremiya wa va sapuila eci catiamẽla keyambulo Yehova a laikele oku nena kokuavo. Pole, omanu va fetika oku u yola epembe.

Noke lianyamo vamue, Yosiya wa fa. Pole, eci papita olosãi vitatu omõlaye Yehoyakimi wa linga osoma. Yeremiya wamamako oku sapuila omanu hati: ‘Nda ka wa pongolokeli kovilinga viene vĩvi, o Yerusalãi yi nyõliwa.’ Noke ovitunda via kuata Yeremiya loku popia laye hati: ‘Omo lioku popia ovina evi, o pondiwa.’ Kuenje va popia lakulu va Isareli hati: ‘Omunu u o sesamẽla oku fa, momo wa popela imbo lilo oku li pisa.’

Nye Yeremiya a linga? Yeremiya ka kuatele usumba! Eye wa sapuila omanu vosi hati: ‘Yehova eye wa ndi tuma oku sapula ovina evi. Nda ene ka wa pongolokeli kovilinga viene, o Yerusalãi yi nyõliwa. Pole, ivaluki okuti, nda wa ndi pondi, vu pondi omunu umue ka kuete eko.’

Olombuale via liwekapo oku sanda omuenyo wa Yeremiya. Pole omanu ka va pongolokele kovilinga viavo vĩvi. Noke Nevukandesa soma yo Bavulono weya oku liyaka lo Yerusalãi. Eye wambata ko Bavulono omanu valua va Isareli kuenje va linga apika vaye. Sokolola ño ndomo ove o pondola oku kala, nda wambatiwa lomanu vamue kua kũlĩhile loku enda kofeka yavo!

Yeremiya 1:1-8; 10:1-5; 26:1-16; 2 Olosoma 24:1-17.