Nganea 74: Muṱhannga a Sa Ofhi
Vhonani vhathu vha tshi khou tamba nga uyu muṱhannga. Ni a ḓivha uri ndi nnyi? Uyu ndi Yeremia. Ndi muporofita wa Mudzimu.
Nga u ṱavhanya nga murahu Khosi Yosia a tshi thoma u fhelisa zwifanyiso shangoni, Yehova a vhudza Yeremia u vha muporofita Wawe. Naho zwo ralo, Yeremia o humbula uri o vha e muṱukusa u vha muporofita. Fhedzi Yehova a ri u ḓo mu thusa.
Yeremia a vhudza Vhaisiraele u litsha u ita zwithu zwivhi. A ri: ‘Midzimu i rabelwaho nga dzitshaka ndi ya mazwifhi.’ Fhedzi Vhaisiraele vhanzhi vho vha vha tshi nga namba vha rabela zwifanyiso u fhira Yehova. Yeremia a tshi vhudza vhathu uri Yehova o vha a tshi ḓo vha ṱarafela vhuvhi havho, vha sokou mu sea.
Yosia a fa, miṅwedzi miraru nga murahu murwa wawe Yoyakimi a vha khosi. Yeremia a ḓi vhudza vhathu: ‘Yerusalema u ḓo fheliswa arali na sa shandula nḓila dzanu mmbi.’ Vhotshifhe vha fara Yeremia vha huwelela: ‘U fanela u vhulawa nge wa amba izwi zwithu.’ Zwenezwo vha vhudza vhakololo vha Isiraele: ‘Yeremia u fanela u vhulawa, ngauri o sema muḓi.’
Yeremia o vha a tshi ḓo itani zwino? O vha a sa ofhi! A vhudza vhoṱhe: ‘Yehova o nthuma u ni vhudza izwi zwithu. Arali na sa shandula nḓila dza vhoinwi mmbi dza u tshila, Yehova u ḓo fhelisa Yerusalema. Fhedzi ni vhone: Arali na mmbulaha, ni ḓo vha ni tshi khou vhulaha muthu a songo tshinyaho.’
Vhakololo vha litsha Yeremia a tshila, fhedzi Vhaisiraele vha si shandule nḓila dzavho mmbi. Nga murahu Nebukadanetsara, khosi ya Babele a ḓa a lwa na Yerusalema. Mafheleloni a ita Vhaisiraele vhaḓinḓa vhawe. A dzhia vha zwigidi zwinzhi a vha isa Babele. Edzanu humbula uri zwi nga tou vha hani u dzhiiwa nga vhathu vhane ni si vha ḓivhe vha ni isa hune ni si hu ḓivhe!
Yeremia 1:1-8; 10:1-5; 26:1-16; 2 Dzikhosi 24:1-17.
Mbudziso
- Muṱhannga uyu a re kha tshifanyiso ndi nnyi?
- Yeremia u ḓipfa hani nga ha u vha muporofita, fhedzi Yehova u mu vhudza mini?
- Ndi mulaedza ufhio une Yeremia a dzula a tshi khou vhudza vhathu?
- Vhotshifhe vho lingedza hani u thivhela Yeremia, fhedzi o sumbedza hani uri ha ofhi?
- Ho itea mini musi Vhaisiraele vha sa shanduli nḓila dzavho mmbi?
Mbudziso dzo engedzeaho
- Vhalani Yeremia 1:1-8.
Samusi tsumbo ya Yeremia i tshi sumbedza, ndi mini zwine zwa ita uri muthu a fanelee u vha tshumeloni ya Yehova? (2 Vha-Kor. 3:5, 6)
Ndi ṱhuṱhuwedzo ifhio ine tsumbo ya Yeremia ya vha nayo kha vhaswa vha Vhakriste ṋamusi? (Muh. 12:1; 1 Tim. 4:12)
- Vhalani Yeremia 10:1-5.
Ndi tsumbo ifhio i re na maanḓa ye Yeremia a i shumisa u itela u sumbedza mahandana a u fulufhela zwifanyiso? (Yer. 10:5; Yes. 46:7; Hab. 2:19)
- Vhalani Yeremia 26:1-16.
Ṋamusi musi ri tshi khou ḓivhadza mulaedza u sevhaho, vhaḓodzwa vha dzhiela hani nṱha ndaela ya Yeremia ya u sa ‘sia na ipfi na ḽithihi’? (Yer. 26:2; Doit. 4:2; Mish. 20:27)
Ndi tsumbo ifhio yavhuḓi ye Yeremia a i vhetshela Ṱhanzi dza Yehova ṋamusi musi vha tshi khou ḓivhadza tsevho kha dzitshaka? (Yer. 26:8, 12, 14, 15; 2 Tim. 4:1-5)
- Vhalani 2 Dzikhosi 24:1-17.
Ndi mvelelo dzifhio dzi pfisaho vhuṱungu dze dza wela ḽa Yuda nga u sa fulufhedzea kha Yehova? (2 Dzikh. 24:2-4, 14)
