ALOLE ŵandu ŵakumnyosya mcandaju. Ana mcandaju akummanyilila? Jweleju ali Yelemiya. Jwalakwe ali jwakulocesya jwa Mlungu jwakusosekwa mnope.

Mwenye Yosiya ali agambile kutanda kwene konanga mitembe m’cilambomo, Yehofa akumsalila Yelemiya kuti aŵe jwakulocesya Jwakwe. Nambo Yelemiya akuliwona kuti ali kamwanace mnope kuti aŵe jwakulocesya. Nambo Yehofa akumsalila kuti cacimkamucisya.

Yelemiya akwasalila Ayisalayeli kuti alece kutenda yindu yakusakala. Jwalakwe akuŵeceta kuti: ‘Milungu jakujilambila ŵandu ŵamitundu jine jili jaunami.’ Nambo Ayisalayeli ŵajinji kukwanonyela kulambila mitembe mmalo mwakulambila Yehofa Mlungu jusyesyene. Yelemiya pakwasalila ŵandu kuti Mlungu cacapa cilango ŵanduwo ligongo lya yakusakala yakutenda, ŵanduwo akwamba kumseka.

Yaka yikumala, Yosiya akuwa, kaneko pali papite miyesi jitatu Yehoyakimu mwanagwe Yosiya akuŵa mwenye. Yelemiya akwendelecela kwasalila ŵandu kuti: ‘Yelusalemu cajonanjikwe naga jemanja ngamsinda yitendo yenu yakusakala.’ Ŵambopesi akumkamula Yelemiya ni kumkalipila kuti: ‘Mkuŵajilwa kuwa ligongo lya yamkuŵecetayi.’ Kaneko akwasalila acakulungwakulungwa ŵa mu Yisalayeli kuti: ‘Yelemiya akusosekwa kum’wulaga, ligongo aŵecete yindu yakusakala pakwamba ya msinda wetu.’

Ana sambano Yelemiya catende cici? Jwalakwe ngakogopa! Akwasalila wosopewo kuti: ‘Yehofa ŵandumisye kuti mbecete yinduyi kwa jemanja. Naga ngakusinda yitendo yawo yakusakala, Yehofa cajonanje Yelusalemu. Nambo amanyilile kuti: Naga akumbulaga une, cam’wulaje mundu jwangalemwa cilicose.’

Acakulungwakulungwa ŵala ngakum’wulaga Yelemiya, nambo Ayisalayeli ngakulekape yitendo yawo yakusakala. Kaneko Nebukadinesala, mwenye jwa ku Babelo, akwika kukuputa ngondo pa Yelusalemu. Kumbesi kwakwe Nebukadinesala akwatenda Ayisalayeli kuŵa ŵakutumicila ŵakwe. Akwajigala Ayisalayeli ŵajinji kwawula nawo ku Babelo. Agambe ganicisya mwampaka yiŵele kuti ŵandu ŵacilendo ŵajigale wawojo kwawula nawo ku cilambo cacilendo!