Historia 74

Ti hombre ni qué ridxibi

BIIYAʼ ca binni cuxidxi de hombrehuiiniʼ ca. Nannuʼ tu hombrehuiiniʼ riʼ la? Laabe nga Jeremías, ti ni riguixhená risaca stiʼ Dios.

Despué de bizulú rey Josías gundaa ca bidóʼ que la? Jiobá rábibe Jeremías gaca ni riguixhená Stibe. Jeremías riníʼ de que nahuiiniruʼ para gaca ni riguixhená. Peru Jiobá rábibe Jeremías de que zacanebe laa.

Jeremías rábibe ca israelita que gusaanacaʼ de gúnicaʼ ca guendaquéiquiiñeʼ sticaʼ. Ca dios runi adorar ca binni ni nabeza xcaadxi guidxi ca cadi dxandíʼ diʼ laacaʼ na Jeremías. Peru stale de ca israelita que jma nga riuláʼdxicabe guni adorárcabe ca bidóʼ ca que guni adorárcabe Jiobá, ti Dios ni dxandíʼ dxandipeʼ. Ora Jeremías rabi laacabe de que Dios zusabanáʼ laacabe pur ca guendaquéiquiiñeʼ stícabe la? ca binni que laca ruxídxicaʼ de Jeremías.

Ridiʼdiʼ stale iza para reeda gati Josías, ne chonna beeu despué xiiñibe Jehoiaquim reeda gaca rey. Jeremías cadi cayanadxí diʼ de gabi ca binni que: Jerusalén zanitilú pa laatu qué guchaatu. Ca hombre ruzaaquiʼ guʼxhuʼ que rigápicaʼ Jeremías ne rábicabe laabe: Naquiiñeʼ gátiluʼ purtiʼ caniʼluʼ guiráʼ ndiʼ. Óraque rábicabe ca príncipe stiʼ Israel: Jeremías naquiiñeʼ gati purtiʼ caniʼbe mal de xquídxinu.

Xi guni Jeremías yanna pue. ¡Laabe cadi cadxíbidibe! Ngue runi rábibe guiráʼ ca binni que: Jiobá biseenda naa para gabe ca diidxaʼ riʼ laatu. Pa qué guchaatu modo nabánitu la? laabe zunitilube Jerusalén. Peru gábecaʼ laatu: Pa guutitu naa la? gánnacatu de que chiguutitu ti hombre chaʼhuiʼ.

Ca príncipe que la? qué ruutidíʼcabe Jeremías, peru ca binni de Israel qué ruchaadicaʼ. Despué, Nabucodonosor rey stiʼ guidxi Babilonia reeda gucaalú Jerusalén, ne rinebe ca israelita que para gácacaʼ esclavu stibe. Rinebe stale binni Babilonia. ¡Guníʼ ique si xi ñaca pa ñeeda sti binni qué runibiaʼluʼ niné lii sti guidxi!

Jeremías 1:1-8; 10:1-5; 26:1-16; 2 Reyes 24:1-17.