BIBIʼ guirá buñ ni caxiich de mbioxhlas ni noʼ ló dibuj. ¿Nanlo chú láabu la? Mbioxhlas reʼ laa Jeremías, toib buñguieeu ni raniʼ diitz ni rasac ni Jehová raquiin par guiniʼ xí gac dzú ni sietra.

Diti xidzú de goló Josías rasaló ranitlóbu dioxh falz lainy gudx Israel, Jehová golú a Jeremías par gacbu buñguieeu ni guiniʼ xí gac dzú ni sietra. Jeremías raluladx que mbioxhlasa láabu par guinibu xí gac dzú ni sietra. Per Jehová ná que gacné láabu.

Jeremías raiby a israelitas que guisianyibu de gonyibu cós mal. Jeremías raniʼ: Dioxh ni xidal buñ rien nacní dioxh falz. Per xidal israelitas más raniiny layibu guienyibu dioxh falz, diti a Jehová Dios ni rasuidy xinésni. Órni Jeremías raniʼ que Dios sony castigar layibu por cós mal ni cayonyibu, raxiichyibu Jeremías.

Radudy xidal íz. Josías raity, né radudy tzón beʼo de goló goitybu, xiimbu Jehoiaquim rasaló rony mandary. Jeremías diti rasian raibybu gudx: Jerusalén guinitló pal lóoto diti rasianto mod nacto. Guirá buñguieeu ni rasanir par gony goʼox, ranásyibu Jeremías né raibyibu a guirá buñxirop: Jeremías non gaity, goníbu mal de xcudxno.

¿Xí gony Jeremías nigoreʼ? ¡Jeremías diti radzuiby! Láabu raibybu a guirá buñ: Jehová bixel naʼ par gaiby lóoto guirá ndeʼ. Pal diti rasianto mod ni nacto, Jehová sanitlóbu gudx Jerusalén. Per non guiluladxto ndeʼ: Pal ragaityto naʼ, guigaityto toib buñguieeu ni diti noʼ xí cós mal cayony.

Guirá buñxirop raduidy lagary que Jeremías guibany, per buñ israelitas diti rasian de gonyibu cós mal. Diti xidzú, Nabucodonosor ni rony mandary Babilonia, rieed par guicaló Jerusalén. Radxiin midid, Nabucodonosor ronybu que israelitas radxiin rac xomósbu. Rinéyibu xidalguixo buñ israelitas gudx Babilonia. ¡Bunysi xpensarylo que buñbioʼos niné looy a stoib gudxrop ni diti ma rimbulo!