Awobe Angwen i Babilon
Ododo 75
Awobe Angwen i Babilon
KABAKA Nebukadnejar otero Luicrael ma gukwano matek loyo ducu i Babilon. Lacen kabaka oyero awobe mogo ma mwonya dok ma giryek ki i kin-gi. Jo angwen ki i kin-gi aye awobe ma inenogi kany-nyi. Ngat acel aye Daniel, ki adek mukene-ni jo Babilon lwongogi ni Cadrak, Mecak ki Abednego.
Nebukadnejar mito pwonyo awobe-ni me tic i gange. I nge nongo pwonnye pi mwaka adek en biyero awobe ma ryek-ke wek gukonye ki cobo peko. Kabaka mito ni awobe-ni gubed matek dok ma komgi yot ma nongo gitye ka nongo pwonnye. Pi meno en omiyo cik bot luticce ni myero gumi botgi ducu cam ki vino mabeco ma en kacel ki jo ode gicamo-ni.
Nen kong Daniel. In ingeyo gin ma en tye ka waco bot Acipenaj ladit wi lutic pa Nebukadnejar? Daniel tye ka tito bote ni en pe emito camo jami mabeco ma a ki i meja pa kabaka-ni. Ento par ociro Acipenaj woko. En owaco ni: ‘Kabaka otyeko ciko pi gin ma myero wucam ki gin ma myero wumati. Dok ka komwu pe onen ma yot ma rom ki kom awobe mukene-ni, en romo neka woko.’
Pi meno Daniel ocito bot ngat ma Acipenaj oketo me gwoko en kacel ki lureme adek ca. En owaco ni: ‘Tim ber kong itemwa pi nino 10. Miwa pot dek ki nyig ginapita mogo me acama ki pii amata. Ci lacen iporwa ki awobe ma gicamo cam pa kabaka-ni, wek inen angagi ma nen maber makato.’
Lagwok awobe oye me timo man. Ci i kare ma nino 10 ca otum, Daniel ki lureme adek-ki onongo komgi nen yot kato kom awobe mukene-ni ducu. Pi meno lagwok awobe oye ni gucam pot dek ki nyig ginapita ma ka gin ma kabaka miyo.
I nge mwaka adek gitero awobe ducu bot kabaka Nebukadnejar. I nge lok ki gin ducu, kabaka onongo ni Daniel gin ki lureme adek-ki aye giryek loyo ducu. Pi meno en oketogi i gange me konye. Dok i kare mo keken ma kabaka penyo Daniel, Cadrak Mecak ki Abednego, nyo omiyogi gin mo matek me acoba, gin gingeyo cobone kato lulam dog ki luryekone tyen 10 kulu.
