NABUCODONOSOR apnaqirixa suma yatxattʼat israelitanakaruw Babiloniar apasïna. Uka taypitxa suma uñnaqtʼani yatiñani waynitunakwa ajllsüna. Aka dibujonkaskiw pusinixa. Maynïristi Daniel satawa, ukat mayninakaruxa Sadrac, Mesac ukat Abednego sasaw babilonionakax suti apxatapxäna.

Apnaqañ utana irnaqapxañapatakiw Nabucodonosorax yatichsuñ munäna. ‘Kimsa mara yatichasaxa wali pʼiqini waynitunakwa ajllï, jan waltʼäwinak askichañ yanaptʼayasiñataki’ sasaw säna. Ukatakisti waynanakax kʼumara ukat chʼamanipxañapänwa, ukatwa Apnaqirixa, kuntï manqʼktxa uk manqʼayapxma, kuntï umktxa uk umayapxam sänxa.

Daniel waynitur uñtma. ¿Nabucodonosoran Aspenaz yanapiripar kamsaskpachas uk yattati? Apnaqirix sumanak manqʼki ukxa janiw manqʼkiristti saskiwa. Ukampis Aspenazax llakisiwa. ‘Aka marka apnaqiriw kuns manqʼapxañama ukxa situ’ siwa. ‘Janitï mayni waynitunakjam kʼumara ukat chʼamanïpkasmaxa, jiwayitaspawa’ sasa.

Ukatwa Danielax Aspenazan uchata uñjiriparux arxayäna, akham sasa: ‘Tunka uru yantʼapxita’ sasa. ‘Chʼuxñanak manqʼañatak churapxita, ukat umampi. Ukat tunkürutsti kawkïri waynanakatï apnaqirin manqʼapa manqʼapki ukanakampi anthapipxita, ukat jumaw uñjäta kunjamäpktix ukxa’ sasa.

Aspenazan uñjiripax iyaw sänwa. 10 urutxa, Danielampi kimsa munat masinakapampix mayninakat sipansa jukʼampi kʼumara chʼamani ukhamapxänwa, ukatwa apnaqirin manqʼap manqʼayañat sipanxa chʼuxñanak manqʼayapxäna.

Kimsa maratxa Nabucodonosoran ukaruw taqi waynitunakar irpapxäna. Ukat parläna uka qhipatxa, Danielampi, Sadracampi, Mesacampi Abednegompiwa wali pʼiqinïpxänxa. Ukatwa, apnaqirix utapan yanapayasïna. Ukat Danielampiru kimsa munat masinakapampir jisktʼäna ukhaxa jan ukax kuna jan waltʼäwinaka tuqit säna ukhaxa jankʼakiw kuns qhanañchapxäna, sacerdotenakapatsa jan ukax yatirinakapatsa 10 kuti jila yatiñanïpxänwa.