DINARA ni Nabucodonosor sa Babilonya an gabos na pinaka may inadalan na Israelita. Dangan, pinili niya su pinakamagayon an tindog asin pinakamataling mga hoben na lalaki. An apat sa mga ini iyo an mga solteritong nasa ritrato. An saro iyo si Daniel, saka an tulo pa nginaranan kan mga Babilonyo na Sadrac, Mesac asin Abednego.

Plano ni Nabucodonosor na sanayon an mga lalaki para maglingkod sa palasyo. Pakalihis nin tulong taon na pagsasanay, pipilion niya an pinakalisto an isip ’nganing tabangan siya sa pagsolusyon sa mga problema. Gusto kan hadi na magin makusog asin masarig sinda mantang sinasanay. Kaya pinagbutan niya an saiyang mga lingkod na tawan sinda kan masisiram na kakanon asin arak arog kan itinatao sa pamilya kan hadi.

Hilinga si Daniel. Ano daw an pigsasabi niya sa mayordomo ni Nabucodonosor na si Aspenaz? Sabi ni Daniel, dai niya kakakanon an mga ipinapakakan kan hadi. Nahadit si Aspenaz. ‘An hadi an nagtaram kun anong kakakanon asin iinumon nindo,’ an sabi niya. ‘Pag nahiling niyang mas maniwang kamo sa iba, tibaad ipagadan niya ako.’

Kaya kinaulay ni Daniel su tinugon ni Aspenaz na mag-asikaso saindang apat na mag-aramigo. ‘Purbaran mo tabi kami nin sampulong aldaw,’ an sabi niya. ‘Gulay saka tubig lang an itao mo samo. Tapos ikumparar mo kami sa iba na nagkakakan nin kakanon kan hadi. Hilingon mo kun si’say an mas maray an hawak.’

Nag-uyon an tagaasikaso. Pakalihis nin sampulong aldaw, mas maray an lawas kan apat na mag-aramigo kisa sa iba. Kaya gulay na an itinatao sainda kan tagaasikaso imbes na an ipinapakakan kan hadi.

Pakalihis nin tulong taon dinara an gabos na lalaki ki Nabucodonosor. Kan kaulayon niya sinda, nahiling kan hadi na si Daniel asin an mga amigo niya an pinakamatali. Kaya pinaistar niya sinda sa palasyo para tabangan siya. Ano man na problema an ihapot kan hadi ki Daniel, Sadrac, Mesac asin Abednego, an kadunungan ninda lamang na marhay sa gabos na saserdote o madunong na lalaki kan hadi.