Stori 75: Fo Boe Long Babilon
KING Nebukadnesa i karem ol man Isrel we oli skulgud oli go long Babilon. Nao hem i jusumaot sam yangfala blong olgeta we oli luk naes mo oli gat hed. Fo long olgeta ya, hemia ol boe we yu luk long pija ya. Wan, hemia Daniel, mo tri narawan, ol man Babilon oli singaot trifala se Sadrak, Mesak, mo Abednego.
Nebukadnesa i gat plan blong trenem ol yangfala ya blong oli kam naf blong wok long haos blong hem. Oli mas tren blong tri yia, nao bambae hem i jusumaot olgeta we oli waes moa blong oli givhan long hem blong stretem ol trabol long ples blong hem. King i wantem se ol boe ya oli strong mo helti taem oli stap tren. Ale hem i givim oda long ol man blong hem se oli mas givim kakae long olgeta we i sem mak long ol rij kakae mo waen we hem mo famle blong hem i stap kakae.
Traem luk yangfala Daniel. ?Yu save wanem samting hem i stap talem long Aspenas we i hed blong ol haeman blong Nebukadnesa? Daniel i stap talem se hem i no wantem blong kakae ol rij samting long tebel blong king. Be Aspenas i fraet long king. Hem i se: ‘King i makemrere finis ol samting we bambae yufala i kakae mo yufala i dring, mo sipos hem i luk we yufala i no strong olsem ol narafala yang man ya, bambae hem i kilim mi mi ded.’
Nao Daniel i go luk gad we Aspenas i putum hem i stap, blong lukaot long hem wetem trifala fren blong hem. Hem i talem long gad ya se: ‘I gud yu stap givim ol kakae blong garen nomo long mifala, mo yu givim wota nomo blong mifala i dring, gogo kasem ten dei. Nao biaen, bambae yu traem makem mifala, wetem ol narafala yang man ya we oli stap kakae ol kakae ya blong king, mo yu save luk mifala, se mifala i strong no olsem wanem.’
Nao gad i agri blong letem olgeta oli traem olsem go kasem 10 dei. Mo taem 10 dei ya i pas, hem i luk we bodi blong Daniel wetem trifala fren blong hem i gud moa, mo oli strong moa i bitim ol narafala yang man ya. Nao stat long taem ya, gad ya i no moa givim ol kakae mo waen blong king long olgeta, hem i stap givim ol kakae blong garen nomo.
Long en blong tri yia, haeman i tekem ol yangfala ya oli go blong luk Nebukadnesa. Nao king i toktok wetem olgeta evriwan, be hem i luk se Daniel wetem trifala fren blong hem, oli gud we i gud moa i winim ol narafala ya. Ale hem i tekem olgeta oli kam stap long haos blong hem blong oli givhan long hem. Long olgeta kwestin we hem i askem, mo long olgeta samting we hem i wantem faenemaot, be Daniel, Sadrak, Mesak mo Abednego, oli save gud. Waes mo save blong olgeta i 10 taem moa long hemia blong ol pris mo waes man blong king.
Daniel 1:1-21.
Ol Kwestin
- ?Hu ya fofala boe long pija ya? ?From wanem fofala i stap long Babilon?
- ?Wanem plan blong Nebukadnesa long saed blong folfala boe ya? ?Hem i givim wanem oda long ol man blong wok blong hem?
- ?Daniel i talem se hem wetem trifala fren blong hem, oli wantem wanem long saed blong kakae mo dring?
- ?Afta ten dei ya we Daniel mo trifala fren blong hem oli kakae ol kakae blong garen nomo, bodi blong olgeta i sem mak long ol narafala yangfala no nogat?
- ?Olsem wanem Daniel mo trifala fren blong hem oli kam stap long haos blong king? ?Olsem wanem fofala ya i moa gud i winim ol pris mo waes man blong king?
Sam narafala kwestin
- Ridim Daniel 1:1-21.
?Yumi mas traehad olsem wanem sipos yumi wantem winim ol traem mo stretem ol slak fasin blong yumi? (Dan. 1:8; Jen. 39:7, 10; Gal. 6:9)
?Wanem sam samting we oli olsem ‘kakae blong king,’ we oli save pulum ol yangfala tede? (Dan. 1:8; Prov. 20:1; 2 Kor. 6:17-7:1)
?Baebol stori blong fofala Hibru yangfala ya i givhan long yumi blong luksave wanem samting long saed blong ol save mo waes blong wol? (Dan. 1:20; Aes. 54:13; 1 Kor. 3:18-20)
