Maana 75nan

Kamalennin naani Babilonɛ dugu kɔnɔ

ISRAƐLKA minnu tun kalannen bɛ kosɛbɛ, masakɛ Nebukadnezar ye olu bɛɛ cɛ ka taa ni u ye Babilonɛ. O mɔgɔ kalannenw la, kamalennin minnu tun cɛ ka ɲi ani minnu tun hakili ka di ka tɛmɛ tɔw bɛɛ kan, masakɛ ye olu ta ka bɔ tɔw cɛ la. I ɲɛ bɛ kamalennin naani minnu na yan yɔrɔ la, olu ye o mɔgɔ talen dɔw ye. Kelen ye Daniɛl ye. Babilonɛkaw ye saba tɔw tɔgɔ da ko Sadrak, Mesak, ani Abɛd-Nego.

Nebukadnezar tun b’a fɛ o kamalenninw ka kalan san saba kɔnɔ, walisa kɔfɛ u ka baara kɛ a ka palɛ la. O san saba kalan kɔfɛ, minnu hakili ka di ka tɛmɛ tɔw bɛɛ kan, a tun bɛna olu dɔrɔn ta walisa u ka ale dɛmɛ ka jamana kunkow ɲɛnabɔ. O la sa, kalan tun ka kan ka kɛ waati min kɔnɔna na, masakɛ tun b’a fɛ kamalenninw ka kɛnɛya kosɛbɛ, ani ka fanga fana sɔrɔ o waati kɔnɔna na. O kosɔn, a y’a fɔ  a ka baarakɛdenw ye ko ale ni a ka denbaya bɛ dumuni min kɛ, ani u bɛ diwɛn min min, ko o fɛn kelenw ka di kamalenninw ma.

E ka Daniɛl lajɛ. I b’a dɔn a bɛ ka min fɔ Nebukanezar ka baarakɛden kuntigi Aspenaz ye wa? Daniɛl bɛ k’a fɔ a ye ko masakɛ bɛ fɛn duman minnu dun, ko ale t’a fɛ ka olu dun. O ye Aspenaz jɔrɔ kosɛbɛ. A ko: ‘Aw ka kan ka fɛn min dun, ani ka fɛn min min, masakɛ ye o fɔ. Ni aw ma kɛ mɔgɔ kɛnɛman ye i n’a fɔ kamalennin tɔw, a bɛna ne faga.’

Aspenaz tun ye cɛ min bila Daniɛl ni a teri saba ka ko kunna, Daniɛl taara o cɛ fɛ k’a fɔ a ye ko: ‘Ne b’i deli i ka nakɔ kɔnɔfɛnw di an ma ka dun, ka ji gansan di an ma ka min tile 10 kɔnɔ k’a filɛ. O tile 10 kɔfɛ, kamalennin minnu bɛ masakɛ ka dumunifɛnw dun, i ka anw ɲɛda ni olu ɲɛda lajɛ walisa k’a dɔn kɛnɛya bɛ minnu ɲɛda kan ka tɛmɛ tɔw kan.’

Cɛ sɔnna o ma. Tile 10 dafara tuma min na, Daniɛl ni a teri saba tun bɔlen bɛ mɔgɔ kɛnɛmanw fɛ ka tɛmɛ kamalennin tɔw bɛɛ kan. O kosɔn, cɛ sɔnna k’u to u ka nakɔ kɔnɔfɛnw dun masakɛ ka dumunifɛnw nɔ na.

San saba banna tuma min na, kamalenninw bɛɛ nana Nebukadnezar ɲɛkɔrɔ. A kɛlen kɔ ka kuma u bɛɛ fɛ, masakɛ y’a ye ko Daniɛl ni a teri saba de hakili ka di ka tɛmɛ tɔw bɛɛ kan. O la sa, a ye olu to a fɛ yen walisa u k’a dɛmɛ palɛ la. Masakɛ tun mana Daniɛl ni Sadrak ni Mesak ni Abɛd-Nego ɲininka fɛn o fɛn na, walima a tun mana ko gɛlɛn minnu da u ɲɛkɔrɔ, Daniɛl ni a teriw tun bɛ o fɛnw jaabiw, walima o kow ɲɛnabɔcogo dɔn ka tɛmɛ Nebukadnezar ka sarakalasebagaw ni a ka hakilitigiw kan siɲɛ 10.

Daniɛl 1:​1-21.