SIANGPAHRANG Nebukhadnezzar nih fimthiamnak a ngei bik mi Israel mi vialte kha Babilon ah a kalpi dih hna. Khi hnu ah an lak i aa dawh bik mi le a fim bik mi tlangval kha siangpahrang nihcun a thim ṭhan hna. Anmah lak i pali cu hi hmanthlak chung i nan hmuh mi hna hi an si. Pakhat cu Daniel a si, a dang pathum hna cu Babilon mi hna nih Shadrak, Meshak le Abednego an ti hna.

Nebukhadnezzar nih hi tlangval hna cu a siangpahrang inn chung i rian ṭuan awk ah cawnpiak a timh hna. Kum thum chung an cawn hnu ah a fim bik mi lawng kha amah rian bawmtu ding ah a thim hna lai. An cawn chung ahcun hi tlangval hna cu an tha ṭhawng seh law an ngan dam seh ti kha siangpahrang nih a duh hna. Cucaah amah le a innchungkhar mi hna an ei an din mi ei le din vialte kha pek ve awk ah a sal hna kha nawl a pek hna.

Tlangvalno Daniel hi zoh hmanh u. Nebukhadnezzar a sal haotu Ashpenaz kha zei bia dah a chim nan hngal maw? Singpahrang cabuai i a thau i a thaw mi rawl cu ei ka duh lo tiah a chimh. Sihmanhsehlaw Ashpenaz cu a thin a phang. ‘Siangpahrang nih zeidah nan ei lai i, zeidah nan din lai ti cu a khiah cia mi a si. Tlangval dang hna bantuk in a ngan a dam mi mui nan ken lo sual ahcun, keimah kha a ka thah ko lai,’ tiah a ti.

Cucaah Daniel cu Ashpenaz nih amah le a hawile pathum a cawng ding ah a chuah mi cawngtupa sin ah a kal i: ‘Zangfahnak in ni hra chung kan hneksak tuah. Ei awk ah tisik anhnah le din awk ah ti lawng kan pe. Cun siangpahrang rawl a ei mi tlangval dang hna he kan tahchunh law ahodah a ṭha deuh ti kan zoh tuah,’ tiah a ti.

Cawngtupa cu a hna a tla. Cun ni 10 cu a tlin tik ah, Daniel le a hawile pathum cu tlangval dang vialte nak in a ngan a dam deuh mi an lo. Cucaah khi salpa nih siangpahrang nih a pek mi hna can ah khan tisik anhnah lawng cu ei awk ah a pek hna.

Kum thum a dih tik ah tlangval no vialte cu Nebukhadnezzar sin ah an chuahpi hna. Annih he bia a ruah dih hnu hna ah siangpahrang nihcun Daniel le a hawile pathum cu a fim bik in a hmuh hna. Cucaah amah bawmtu ding ah a siangpahrang inn ah khan a chuah hna. Cun siangpahrang inn ah khan a chiah hna. Cun siangpahrang nih Daniel, Shadrak, Meshak le Abednego kha bia a hal tik hna paoh ah a tlang bawi le a mifim hna nak in let 10 in an hngalh deuh tawn.