REI Nabucodonosor, Babiloniase Israel dorgan bur nue odurdaglegarmalad sesa. Geb sorbali, egwasa sabbingan bur yeerdaglemaladi, geb yeer ibmar wismaladi. Sobaledgi, warbagge aamala be dagge. Wargwen nuga Daniel, geb baigan sabbingan warbaagwaddi, Babilonia dorgan onugsasmala Sadrac, Mesac geb Abednego.

E negyagine arbamalad gala Nabucodonosor we sabbingan odurdagbie. Birgabaa gusale, geb egwabaloe sabbingan bur yeer ibmar wisi gumaloedi, e bendagmalagala igar soggwen aburnair nudagged gine. Nabucodonosor abege we sabbingan duddusur gumaladi, degsoggua, e gwenadgan mas igiidi gunne geb e dulemoga mas igiid gunmoga, mas aa giidi we sabbingangala ugmaloye igar mesisa.

Daniel be daggena. ¿Be wisi igi Aspenazga soggwissi? Aspenazdi Nabucodonosor e maigan e dummadi. Daniel we dulega soge, budar rey mesegi mas yeergullemalad buggwadi gunye. Auggine, Aspenaz suriddoge igi saer gebe. Soge: ‘Rey igar ugsad bemar ibu ibmar gunnoe, geb ibu gobmaloe. Ar bemar baigan sabbingan yobi nued daglesurmalale, sun an oburgweleged’.

Aspenaz guardia onugsasa, Danielgi naggulegega geb e aimar warbaagwadgi naggulebaliga. Geb Daniel we guardiaga soge: ‘Be anmar wilubdaggo, 10 días wilub. Be anmarga ibmar gagangimaladbi gunnega uggo, geb dii gobega. Degiidgi, be anmar wilubdaggo bamalad sabbingan rey mas gunmaladbo, geb be daggoe doa bur nued daglegodibe’.

Guardia soge, degir nabirye. Geb 10 días gusgua, Daniel geb e aimar warbaagwadi bur nued daglearmala bamalad sabbinganba, degsoggu, ibmar gagangimaladbi nabir gundii imaglesmarsunna, rey mas ugmaid anar.

Birgabaa gusgua, bela sabbingan selesmala rey Nabucodonosorse. Geb wemarga sunmasad sorbali, rey Nabucodonosor dagnoniggi, Daniel geb e aimar warbaagwadi bur yeer ibmar wismala. Agala e neg yagi sedii imasa e bendagmaladga. Geb rey ibmar egissalile, degine, negaburnai soggalile Danielga geb Sadrac, degine, Mesac geb Abednegoga, dagleardamala sacerdotemarba geb reyga binsaed dagmaladba bur bule ibmar wismala.