NDIDEM Neb·u·chad·nezʹzar ada kpukpru nti mme ọfiọkn̄wed nditọ Israel aka Babylon. Ekem, edidem emek ata ndiye n̄kparawa ẹfiọkde n̄kpọ ẹkan ke otu mmọ. Inan̄ ke otu mmọ ẹdi nditọ iren oro afo okụtde mi. Kiet edi Daniel, ndien ita eken, mbon Babylon ẹkot Shaʹdrach, Meʹshach ye A·bedʹne·go.

Neb·u·chad·nezʹzar odiomi ndikpep n̄kparawa emi ẹnam n̄kpọ ke ufọk ubọn̄ esie. Ke ẹma ẹkekpep ke isua ita, enye eyemek sụk mme ata asian n̄kan ndin̄wam enye ndikan mme mfịna. Edidem oyom n̄kparawa emi ẹkop idem ẹnyụn̄ enyene nsọn̄idem nte ekpepde mmọ. Ntre enye owụk mme asan̄autom esie ẹnọ mmọ kpukpru ukem nti udia oro imọ ye ubon imọ idiade.

Sese akparawa Daniel. Nte ọmọfiọk se enye ọdọhọde etubom mme asan̄autom Neb·u·chad·nezʹzar, Ashʹpe·naz? Daniel ke asian enye ete imọ iyomke ndidia nti udia ẹtode okpokoro edidem. Edi Ashpe·naz okop mfịna. Enye ete, ‘edidem ebiere se mbufo edidiade edinyụn̄ ẹn̄wọn̄de.’ ‘Ndien ke mbufo mikopke nsọn̄idem nte n̄kparawa eken, enye ekeme ndiwot mi.’

Ntre Daniel etiene owo ukpeme kiet oro Ashʹpe·naz onịmde ese enye ye ufan esie ita. Enye ete, ‘Mbọk sịn nnyịn ke udomo ke usen 10.’ ‘Nọ nnyịn ikọn̄ in̄wan̄ idia ye mmọn̄ in̄wọn̄. Do, domo nnyịn ye n̄kparawa eken ediade udia edidem, ndien se mme mmanie ẹfọn ẹkan.’

Andikpeme onyịme emi. Ndien ke usen 10 oro ẹsịmde, Daniel ye mme ufan esie ẹkop idem ẹkan kpukpru n̄kparawa eken. Ntre, owo ukpeme ayak mmọ ẹkaiso ndidia ikọn̄ in̄wan̄ utu ke udia edidem.

Ke utịt isua ita, ẹda kpukpru n̄kparawa owo ẹsọk Neb·u·chad·nezʹzar. Ke ẹma ẹketịn̄ ikọ ẹnọ mmọ kpukpru, edidem okụt Daniel ye mme ufan esie ita ẹfiọkde n̄kpọ ẹkan kpukpru. Ntre enye onịm mmọ ndin̄wam enye ke ufọk ubọn̄ esie. Ndien ini ekededi edidem obụpde Daniel, Shaʹdrach, Meʹshach ye A·bedʹne·go mme mbụme, mme ọnọde mmọ n̄kpọsọn̄ mfịna, mmọ ẹfiọk n̄kpọ utịm ike-10 ẹkan mme oku mmọ mme mme ọfiọkn̄kpọ owo mmọ.