NÜMAASHII Nabucodonosor Babiloniamüin na israeliita kekiikana maʼin. Mapa nüneekaka jimaʼalii eeka anashichein otta kekiin maʼin. Piirakaa nümüin Daniel, Sadrac, Mesac otta Abednego suluʼu tü ayaakuaakat.

Nikirajeein naya Nabucodonosor süpüla nakaaliinjüin nia sünain anaateʼera kasa eeka mojuin. 3 juya süchikijee tia nüneeküinjana na kekiikana maʼin. Nücheküin anain maʼin naya, nuluwataaka na aʼyataashiikana nümüin süpüla nekirüin naya tü eküülü nikakat sümaa nüpüshi.

Piirakaa nümüin Daniel. ¿Pütüjaa aaʼu jamüsü nünüiki nümüin Aspenaz, chi aʼyataaikai nümüin Nabucodonosor? Nnojotsü nikeein tü nikakat chi aluwataaikai naashin. Mojusü naaʼin Aspenaz, nümaka: ‹Nüneeküin chi aluwataaikai tü jiküinkat otta tü jüsüinkat. Nnojoliire anain maʼin jia maʼaka naaʼin na wanee jimaʼaliikana nuʼuteechi aaʼin taya›.

Nümaka Daniel nümüin chi eʼrajüikai naaʼu nutuma Aspenaz: ‹Paapa weküin süchon wunuʼu otta wüin soʼu 10 kaʼi. Süchikijee puwanaajireʼera waya namaa na jimaʼalii ekakana tü nikakat chi aluwataaikai, piyaawateenaka na anakana maʼin›.

Anasü nümüin chi eʼrajüikai tia. Sülatapa 10 kaʼi, anashi maʼin Daniel otta na naʼaleewainkana. Nuuʼulaaka naya neküin tü süchonkat wunuʼu.

Sajaʼttapa tü apünüinkat juya eʼikajaanüshii na jimaʼaliikana eemüin Nabucodonosor. Naashajaapa namaa niyaawataka kekiin maʼin Daniel otta na naʼaleewainkana. Niʼitaaka naya süpüla nükaaliinjüin nia nipialuʼu. Nüsakirüle naya süchiki wanee kasa kekiishii maʼin noulia na sacerdotekana otta na ooʼulaküliikana.