VAJNTXWV Nenpukhanexa coj tag nrho cov Yixayee uas txawj ntse tshaj mus rau tim Npanpiloo. Tom qab ntawd, vajntxwv xaiv cov tub hluas uas zoo nraug thiab ntse tshaj. Plaub tug tub hluas hauv daim duab no yog ib co uas vajntxwv tau xaiv. Muaj ib tug hu ua Daniyee. Cov Npanpiloo muab 3 tug uas nrog Daniyee ua ke ntawd tis npe hu ua Salab, Mesa thiab Anpenekau.

Nenpukhanexa xav cob qhia cov tub hluas los mus ua haujlwm hauv nws lub tsev. Tom qab lawv kawm tau 3 xyoos, vajntxwv yuav xaiv cov uas ntse tshaj los pab nws tu teeb meem. Thaum lub sijhawm uas lawv tabtom kawm, vajntxwv xav kom lawv muaj zog thiab noj qab nyob zoo. Yog li ntawd, vajntxwv thiaj hais kom cov tub qhe muab nws tej zaub mov zoo thiab tej cawv rau cov tub hluas ntawd noj thiab haus.

Koj puas pom Daniyee nyob hauv daim duab no? Koj puas paub Daniyee tabtom hais dabtsi rau Nenpukhanexa tus thawj tub qhe Apena? Daniyee hais rau nws tias, Daniyee tsis xav noj tej zaub mov zoo uas vajntxwv muab. Qhov ntawd ua rau Apena txhawj heev. Nws hais tias: ‘Vajntxwv twb xaiv tej uas nej yuav noj thiab haus lawm. Yog tias nej tsis puv thiab tsis muaj zog li lwm cov tub hluas, tej zaum vajntxwv yuav muab kuv tua.’

Yog li ntawd, Daniyee thiaj mus cuag tus uas Apena tsa los saib xyuas Daniyee thiab nws 3 tug phoojywg. Daniyee hais tias: ‘Thov koj sim peb 10 hnub saib. Cia li muab zaub thiab dej rau peb noj thiab haus xwb. Ces koj mam muab peb piv rau lwm cov tub hluas uas noj vajntxwv tej mov, es saib seb leejtwg puv thiab muaj zog dua.’

Tus saib xyuas kuj pom zoo ua li ntawd. Tom qab 10 hnub, Daniyee thiab nws 3 tug phoojywg tseem puv thiab muaj zog dua lwm cov tub hluas. Yog li ntawd, tus saib xyuas thiaj tsis muab vajntxwv tej mov rau lawv noj lawm. Nws cia lawv noj zaub lawm xwb.

Tom qab 3 xyoos lawm, lawv coj tag nrho cov tub hluas mus cuag Nenpukhanexa. Thaum vajntxwv nrog cov tub hluas tham tag, nws pom tias Daniyee thiab nws 3 tug phoojywg yog cov uas ntse tshaj. Yog li ntawd, nws thiaj cia lawv ua haujlwm hauv nws lub tsev. Thaum vajntxwv nug Daniyee, Salab, Mesa thiab Anpenekau txog tej yam nyuaj nyuaj, lawv paub ntau tshaj vajntxwv tej pov thawj thiab tej neeg txawj ntse 10 npaug.