KING Nebukanesa ese idia sikuli namonamo Israela taudia ibounai be Babulonia dekenai ia abidia lao. Unai murinai idia huana amo king ese hairai bada bona diba momo memero matamatadia ia abia hidi. Idia be inai laulau dekenai oi itaia memero foa. Idia ta be Daniela bona Babulonia taudia ese toi idia gwauraia Sataraka, Misaka bona Abetenigo.

Nebukanesa ia ura unai memero matamatadia ia hadibaia ena ruma ai idia gaukara totona. Lagani toi murinai, diba momo memerodia sibona do ia abia hidi ia idia durua hekwakwanai idia hamaoromaoroa totona. King ia ura memero idia hadibaia neganai, edia tauanina ia goada bona idia gorere lasi. Unai dainai ena hesiai taudia ia hamaorodia ia bona ena ruma bese ese idia abia aniani namodia bona uaina be memero ibounai dekenai do idia henia danu.

Mero matamatana Daniela mani oi itaia. Nebukanesa ena hesiai tauna badana, Asipenasa dekenai ia gwauraia noho herevana oi diba, a? Daniela ese ia hamaoroa, ia ura lasi king ena teibolo dekenai idia noho aniani digaradia ia ania. To Asipenasa ia laloa momo. Ia gwau: ‘King ese umui ania bona umui inua gaudia ia gwauraia vadaeni. Bona bema emui tauanina ena toana be memero haida edia tauanina ena toana bamona lasi, reana lau do ia alaia mase.’

Unai dainai Daniela be ia bona ena turadia naria totona Asipenasa ese ia abia hidi tauna dekenai ia lao. Ia gwau: ‘Mani emu kara, dina 10 lalonai ai umui tohoa. Uma aniani bona ranu ai dekenai umui henia. Unai murinai aiemai tauanina ena toana be king ena aniani idia ania memero edia tauanina ena toana ida umui hahegeregerea, bona umui itaia daika ena tauanina ena toana be namo.’

Edia naria tauna be edia hereva dekenai ia lalo-tamona. Dina 10 idia ore neganai, Daniela bona ena turadia toi edia tauanina be namo herea, memero ibounai edia bamona lasi. Unai dainai edia naria tauna ese uma aniani sibona ia henia, to king ia henia aniani ia henidia lasi.

Lagani toi murinai memero matamata ibounai be Nebukanesa dekenai idia abia lao. Idia ibounai danu ia herevahereva murinai, king ia itaia Daniela bona ena turadia toi edia diba be bada. Unai dainai ia dogoatao ena ruma lalonai heduru idia henia totona. Bona king ese Daniela, Sataraka, Misaka bona Abetenigo dekenai henanadai eiava hekwakwanai aukadia ia henia neganai, edia diba ese ena hahelaga eiava aonega taudia edia diba be nega 10 amo ia hanaia.