Ovazandu vane mu Babilon
EHUNGI 75
Ovazandu vane mu Babilon
OMBARA Nebukadnesar wa twara Ovaisrael avehe mba hongerwe nawa ku Babilon. Kombunda yanao ombara ya toorora ovarumendu ovawavawa mombuniko na imba ovanazondunge tjinene mokati kawo. Vane vovarumendu mbo ovazandu mbu mo munu mba. Umwe wawo oDaniel, nu imbo vetatu varwe Ovababilon ve ve isana Sadrak, Mesak na Abed-Nego.
Nebukadnesar wa tya okuhonga ovazandu mba kutja ve mu karere mondjuwo ye youhona. Kombunda yozombura ndatu zomerihongero eye ma toorora imba ovanazondunge tjinene uriri kutja ve mu vatere okumangurura omauzeu. Ombara aai vanga kutja ovazandu ve rire ovanamasa novaveruke ngunda amave hongwa. Okutja eye wa rakiza ovakarere ve kutja ngave yandje ovikurya oviwa nomavinu eye neṱunḓu re mbi ve pewa.
Tara omuzandona ngu ma hungire. Eye oDaniel. Ove mo tjiwa kutja eye ma tja tjike komukarere omunene waNebukadnesar, Aspenas? Daniel ee mu raere kutja eye ke nokuvanga okurya oviṋa oviwa okuza kotjiriro tjombara. Nungwari Aspenas ee rikende. Eye wa tja: ‘Ombara ya tya imbi mbi mamu sokurya na imbi mbi mamu sokunwa. Nu eṋe tji mu hi nokumunika ouveruke tjimuna ovarumendu imbo varwe omitanda, eye me ndji zepa.’
Okutja Daniel wa ya komutjevere ngwa zikirwe i Aspenas okuvetjevera na tja ku ye: ‘Arikana tu rora oure womayuva 10. Tu pa ovikunwa tu rye nomeva tu nwe. Okuzambo tu sasaneka novarumendu varwe omitanda mbe rya ovikurya vyondjuwo youhona, nu u tare kutja oouṋe pweṱe ngu ma munika nawa.’
Omutjevere wa itavera okutjita nao. Nu omayuva 10 tji ya kapita, Daniel nomapanga we yetatu aave munika ouveruke povarumendu varwe omitanda avehe. Okutja omutjevere we ve yandjera okurya ovikunwa moruveze rwokurya ovikurya mbyaavi zu kondjuwo yombara.
Komaandero wozombura ndatu ovarumendu avehe omitanda va twarewa ku Nebukadnesar. Kombunda yaindu eye tja za nokuhungira nawo avehe, ombara ya muna kutja Daniel nomapanga we yetatu va ri ovanazondunge povakwao. Okutja eye we ve ṱiza kutja ve mu vatere mondjuwo youhona. Nu aruhe ombara tjaai pura Daniel, Sadrak, Mesak na Abed-Nego omapuriro poo tje ve pa ouzeu ounene okuṱuna, owo aave tjiwa okuyezira povikando 10 kombanda yovapristeri ve poo ovarumendu ve ozombuke.
