Ṛebɛa warrac di lɣerba
TAQSIṬ TIS 75
Ṛebɛa warrac di lɣerba
AGELLID Nabuxadnuẓur yewwi wid akk yeɣran aṭas seg wat Isṛayil ɣer Babil. Mbeɛd ixtaṛ ger imenfiyen-agi wid icebḥen d wid itɛeqqlen akteṛ. Ṛebɛa seg-sen d arrac i teţwaliḍ dagi. Yiwen isem-is Danyil, ma d tlata nniḍen, At Babil semman-asen Cadrax, Micax akk-d Ɛabdnaɣu.
Nabuxadnuẓur iqsed ad yesɣer ilmeẓyen-agi meṛṛa akken ad qedcen deg wexxam-is. M’ara fakken tlata iseggasen n leqraya-yagi, ad yextiṛ kan wid yugaren wiyaḍ di leɛqel akken a t-ɛiwnen ad yefru uguren n tgelda-s. Agellid yebɣa ad sɛun lǧehd d ṣṣeḥḥa di lweqt-nni yakk ara sɛeddin di leḥfaḍa. Dɣa yefka lameṛ akken ad mudden i warrac-nni lerẓaq meṛṛa iteţţ neţţa ţ-ţwacult-is.
Muqel ilemẓi-yagi iheddṛen. Isem-is Danyil. Teẓriḍ acu akka yeqqar i Acfinaz, aqerru n iqeddacen n Nabuxadnuẓur? La s-yeqqar ur yebɣi ara ad yečč lerẓaq i d-ikkan si ṭṭabla n ugellid. Acfinaz yetqelleq, dɣa yenna i Danyil: ‘D agellid i gḍebbren ɣef wayen ara teččem d wayen ara teswem. Ma yella iwala-kkun ur tṣeḥḥam ara am yelmeẓyen-inna nniḍen, izmer a yi-ineɣ.’
Danyil iṛuḥ ihi ɣer uɛessas i gwekkel Acfinaz fell-as akk-d tlata yeḥbiben-is. Yenna-yas: ‘Di leɛnaya-k, jeṛṛeb-aɣ ɛecṛa wussan. Efk-aɣ-d kan lxedṛa d waman. Ssyin sɛeddi-yaɣ zdat-ek nekni d wid iteţţen lqut n ugellid. Imiren wali anwi yesɛan udem izeynen.’
Aɛessas-nni yeqbel ad ixdem aya. Asmi fukken ɛecṛa wussan-nni, udem n Danyil d wid n yeḥbiben-is banen-d ṣeḥḥan akteṛ n wid n warrac nniḍen meṛṛa. Dɣa yeǧǧa-ten uɛessas-nni ad kemmlen učči n lxedṛa wala lerẓaq n ugellid.
Mi ɛeddan tlata iseggasen, wwin ilmeẓyen-nni meṛṛa zdat n Nabuxadnuẓur. Agellid immeslay yid-sen meṛṛa, iwala belli d Danyil akk-d tlata yeḥbiben-is i gḥeṛcen akteṛ ɣef wiyaḍ. Yerra-ten ihi d imeqranen akken a t-ɛiwnen deg wexxam-is. M’ara yesteqsay Danyil, Cadrax, Micax akk-d Ɛabdnaɣu ɣef kra n temsalt neɣ n wugur ameqran, yeţţaf-iten ugaren ɛecṛa iberdan lmuqeddmin d iseḥḥaren meṛṛa n tgelda-s.
