MŨSUMBĨ Nevukatilesa akuie Aisilaeli onthe ala maĩ asomu amatwaa Mbaviloni. Ĩtina wa ũu mũsumbĩ anyuva kuma katĩ woo anake ala maĩ ombe nesa vyũ na ala maĩ oĩ vyũ. Ana katĩ wa asu nĩ anake aa ũkwona vaa. Ũmwe nĩ Ndanieli, na asu angĩ atatũ andũ ma Mbaviloni mametaa Satalaki, Mesaki, na Aveti-neko.

Nevukatilesa avangĩte kũmanyĩsya anake asu nĩ kana mathũkũmae nyũmbanĩ ya ũsumbĩ. Ĩtina wa kũmamanyĩsya kwa myaka ĩtatũ, Nevukatilesa avangĩte kũnyuva o ala oĩ vyũ oka nĩ kana mamũtetheeasye kũmina mathĩna. Mũsumbĩ endaa anake asu methĩwe mena vinya na mĩĩ mĩseo yĩla maendee na kũmanyĩw’a. Kwoou eeĩaĩa athũkũmi make mamanenge onthe ndivai na lĩu mũseo o ũla we na andũ ma nyũmba yake maĩsaa.

Kwasisya mwanake ũũ Ndanieli. We nĩwĩsĩ emwĩa Asivenasi mũthũkũmi mũnene wa Nevukatilesa ata? Emwĩa kana we ndekwenda kũya lĩu mũseo kuma mesanĩ ya mũsumbĩ. Ĩndĩ Asivenasi nũkũkĩa. Easya: ‘Mũsumbĩ nũminĩte kũtw’a kĩla mwaĩlĩte kũya na kũnyw’a. Na ethĩwa mũkooneka mũte na mĩĩ mĩseo ta anake ala angĩ, we nũtonya ũmbũaa.’

Kwoou Ndanieli athi kwa mũsyaĩĩsya ũla Asivenasi waiĩte ĩũlũ wake na anyanyae make atatũ. Na amwĩa: ‘Nĩngũkwĩsũva tũtate ithyĩ matukũ ĩkũmi. Tũnengae isyo sya ũya na kĩw’ũ kya kũnyw’a. Na ĩndĩ ũitũsianĩsya na anake ala angĩ maĩsaa lĩu wa mũsumbĩ, wone naaũ meoneka me aseo.’

Na mũsyaĩĩsya eetĩkĩlana na ũndũ ũsu. Na matukũ asu ĩkũmi mathela, Ndanieli na anyanyae make atatũ maĩ na mĩĩ mĩseo kũthonoka anake ala angĩ onthe. Kwoou mũsyaĩĩsya aeka maendee na kũya isyo vandũ va lĩu kuma kwa mũsumbĩ.

Na ĩtina wa myaka ĩtatũ anake asu onthe matwawa mbee wa Nevukatilesa. Ĩtina wa kũneena namo onthe, mũsumbĩ oona kana Ndanieli na anyanyae make atatũ nĩmo maĩ oĩ vyũ. Kwoou ekala namo nyũmbanĩ ya ũsumbĩ nĩ kana mamũtetheeasye. Na ĩvinda yonthe mũsumbĩ akũlya Ndanieli, Satalaki, Mesaki, na Aveti-neko makũlyo kana maũndũ maito, mo meethĩawa mesĩ kũndũ 10 kũkĩla athembi na andũ make oĩ onthe.

Ndanieli 1:1-21.