LAJ Nabucodonosor, li awabʼej, kixkʼamebʼ saʼ li tenamit Babilonia ebʼ laj Israel li wankebʼ xtzolom. Chirix chik aʼan kixsikʼebʼ ru ebʼ li saaj al li chʼinaʼusebʼ rilbʼal ut wankebʼ xnaʼlebʼ. Saʼ li eetalil aʼin wankebʼ li saaj al li kixsikʼebʼ ru. Jun rehebʼ li saaj al aʼan laj Daniel. Ebʼ laj Babilonia keʼxkʼe li xkʼabʼaʼebʼ li oxibʼ chi ramiiw laj Daniel ut aʼanebʼ: laj Sadrac, laj Mesac ut laj Abednego.

Laj Nabucodonosor kiraj xkʼeebʼal xtzolbʼal ebʼ li saaj al, re naq teʼkʼanjelaq saʼ li rochoch. Ut naq tnumeʼq raj oxibʼ chihabʼ xtzolbʼalebʼ, kixsikʼ raj saʼ xyanqebʼ kaʼajwiʼ li wankebʼ xnaʼlebʼ chiʼus, re naq teʼxtaw xyaalal ebʼ li chʼaʼajkilal. Li awabʼej kixye naq ebʼ li saaj al, teʼrukʼ li bʼiin ut teʼxtzaka li naxwaʼ li awabʼej ut li xjunkabʼal, re naq wanqebʼ xmetzʼew.

Ma nakaanaw kʼaru yook xyeebʼal laj Daniel re laj Aspenaz, li xbʼeenil aj kʼanjel chiru laj Nabucodonosor? Laj Daniel kixye naq inkʼaʼ naraj xtzakankil li wank saʼ xmeex li awabʼej. Laj Aspenaz kiʼok xkʼaʼuxl naq kirabʼi aʼin, joʼkan naq kixye: ‹Li awabʼej kixye kʼaru tento teetzaka ut teerukʼ. Wi inkʼaʼ kawaqex joʼebʼ li junchʼol chi saaj al, naru tinxkamsi›.

Laj Aspenaz kixkanabʼ jun aj puubʼ re naq tixkʼaakʼale laj Daniel ut ebʼ li ramiiw. Laj Daniel kixye re laj puubʼ: ‹Yal xkʼeebʼal qe chiru 10 kutan ru li awimq, li ichaj ut li haʼ. Tojaʼ naq tooʼaajuntaqʼeeta rikʼinebʼ li keʼxwa li xtzakahemq li awabʼej ut taakʼe reetal ani kaw ribʼ chiʼus›.

Laj puubʼ kixbʼaanu li kixye laj Daniel. Naq kinumeʼk li 10 kutan laj Daniel ut ebʼ li oxibʼ chi ramiiw jwal kawebʼ ribʼ chiruhebʼ li junchʼol chi saaj al. Joʼkan naq inkʼaʼ chik keʼkʼeheʼk re li tzakahemq li kixye li awabʼej.

Naq kiwulak oxibʼ chihabʼ chixjunilebʼ li saaj al keʼkʼameʼk rikʼin laj Nabucodonosor ut li awabʼej kiʼaatinak rikʼinebʼ. Tojaʼ naq kixkʼe reetal naq laj Daniel ut ebʼ li oxibʼ chi ramiiw jwal wankebʼ xnaʼlebʼ. Joʼkan naq keʼok chi kʼanjelak saʼ li rochoch li awabʼej. Naq li awabʼej wank saʼ chʼaʼajkilal nachalk rikʼinebʼ laj Daniel, laj Sadrac, laj Mesac ut laj Abednego re naq teʼxchʼolobʼ li chʼaʼajkilal. Laj Daniel ut ebʼ li ramiiw jwal wankebʼ xnawom, joʼkan naq 10 sut keʼxqʼax xnaʼlebʼ laj tij ut ebʼ laj qʼe.