NTOTILA Nebukadenezar nataka na Babilone bantu yina lutaka mayele na kati ya bana yonso ya Israele. Na nima yandi solaka na kati ya bampika yina, baleke ya kuluta kitoko mpi ya mayele. Awa beno kemona, bantu iya na kati ya baleke yonso: Daniel mpi baleke tatu yina bantu ya Babilone pesaka zina ya: Sadrak, Mesak mpi Abednego.

Nebukadenezar zolaka kulonga bau sambu na bisalu na kati ya nzo na yandi. Na nima ya bamvula tatu, bau fwete manisa kulonguka na bau mpi kaka bayina ya kuluta ngangu zolaka kusolama sambu na kusadisa yandi na kutadila mbote mambu ya kimfumu na yandi. Kansi ntete, bau fwete kuvanda na mavimpi ya mbote. Sambu na yau nsiku bakamaka sambu bau dyaka kaka madya yina ntotila vandaka kudya.

Tala Daniel. Yandi ketuba na Aspenaz, mfumu ya bansadi ya Nebukadenezar, lukanu na yandi ya kudya ve madya yina takatuka na mesa ya ntotila. Aspenaz kudibanzaka na ntima mpi tubaka: ‘Mono kebanga nde ntotila yina mepesa beno madya, kumona beno kitoko ve bonso batoko yankaka mpi yandi kufwa mono.’

Ebuna Daniel kutubaka na nsadi yai Aspenaz tulaka sambu na kutalaka yandi mpi banduku na yandi nde: ‘Meka beto na bilumbu 10. Pesa beto kaka ndunda mpi masa. Na nima fwanikisa beto na batoko yankaka yina kedya madya yina ntotila kedya mpi nge tamona nani tavanda na mavimpi ya mbote.’

Nsadi ndimaka na kusala yau. Na nima ya bilumbu 10, Daniel na banduku na yandi vandaka kitoko ya kuluta batoko yina yankaka. Ebuna, nsadi bikaka bau kudya kaka ndunda na kisika ya kudya madya ya mesa ya ntotila.

Na nima ya bamvula tatu, batoko yonso kwendaka na meso ya Nebukadenezar. Ntotila solulaka na bau mpi na kati na bau yonso yandi monaka kaka Daniel na banduku na yandi vandaka ya kuluta ngangu. Yau yina yandi tulaka bau na kisalu na yandi. Mpi na ntangu yina ntotila vandaka kuyula bo bangyufula to kuzabisa bau mambu ya mpasi, bau vandaka kuzaba yau mbala 10 kuluta banganga-Nzambi mpi bantu ya mayele ya kintinu na yandi.