MŨTHAMAKI Nebukadinezaru oire Aisiraeli arĩa othe athomu akĩmatwara Babuloni. Thutha ũcio mũthamaki agĩthuura arĩa maarĩ athaka mũno na ogĩ kuuma he aanake acio ethĩ. Ana a acio nĩo imwana ici ũrona haha. Ũmwe nĩ Danieli, nao arĩa angĩ atatũ Ababuloni maametire Shadraka, Meshaka na Abedinego.

Nebukadinezaru aarĩ na muoroto wa gũthomithia aanake acio ethĩ matungatagĩre nyũmba-inĩ ya mũthamaki. Thutha wa mĩaka ĩtatũ ya gũthomithio mũthamaki aarĩ athuure arĩa ogĩ makĩria matuĩke akũmũteithia kũhiũrania na maũndũ marĩa maritũ. Mũthamaki eendaga aanake acio magĩe na hinya na ũgima wa mwĩrĩ rĩrĩa maarĩ gĩthomo-inĩ. Aathire ndungata ciake ihe aanake acio othe irio iria njega na ndibei iria mũthamaki na famĩlĩ yake maahũthagĩra.

Wĩrorere Danieli. Wahota kũmenya ũrĩa arera Ashipenazi ndungata ĩrĩa nene ya Nebukadinezaru? Danieli aramwĩra atĩ we ndekwenda kũrĩa irio icio njega kuuma metha-inĩ ya mũthamaki. Ĩndĩ Ashipenazi nĩ mũmaku. Oigire ũũ, ‘Mũthamaki nĩatuĩte kĩrĩa mũkũrĩa na kũnyua. Na mũngĩaga kuonekana mũrĩ anoru ta aanake acio angĩ-rĩ, ahota kũnjũraga.’

Kwoguo Danieli agĩgĩthiĩ he mũmaikaria ũrĩa watuĩtwo nĩ Ashipenazi amarũgamĩrĩre hamwe na arata ake atatũ. Aamwĩrire atĩrĩ, ‘Ndagũthaitha ũtũgerie matukũ 10. Tũhe irio cia mboga na maĩ ma kũnyua. Thutha ũcio ũtũroranie na aanake arĩa angĩ marĩaga irio iria njega cia mũthamaki, wĩyonere nũũ wagĩrĩire.’

Mũmaikaria agĩtĩkĩra gwĩka ũguo. Na mo matukũ 10 maathira-rĩ, Danieli na arata ake atatũ monekanire marĩ anoru gũkĩra aanake acio angĩ othe. Rĩu mũmaikaria agĩtĩkĩria mathiĩ na mbere kũrĩa irio cia mboga handũ ha iria mũthamaki aamaheaga.

Thutha wa mĩaka ĩtatũ gũthira, aanake acio othe ethĩ magĩtwarũo he Nebukadinezaru. Na thutha wa kwaria nao-rĩ, mũthamaki akĩona Danieli na arata ake atatũ atĩ nĩo maarĩ ogĩ makĩria. Rĩu akĩmatwara nyũmba-inĩ ya mũthamaki mamũteithagie. Na o hĩndĩ ĩrĩa mũthamaki angĩoririe Danieli, Shadraka, Meshaka na Abedinego ciũria kana ũndũ mũritũ wa kũgia-rĩ, maakoragũo moĩ maita 10 gũkĩra ago na aragũri ake othe.