စီၤပၤဒိၣ်​နဘူၤကးန့စၢ်န့ၣ် က့ၤဖီၣ်ဝဲ ပှၤအံၣ်စရ့လးဖိ​လၢ အကူၣ်ဘၣ်ကူၣ်သ့တဖၣ်​ခဲလၢာ် ဆူ​ဘၤဘူၤလိၣ်​န့ၣ်လီၤ. ဝံၤအလီၢ်ခံ ဃုထၢထီၣ်ဝဲဒၣ် ပှၤ​ဒိၣ်တၢ်ဂ့ၤ​ကတၢၢ်, ပှၤလၢ​အိၣ်ဒီး​တၢ်ကူၣ်တၢ်ဆး အဂ့ၤကတၢၢ်​န့ၣ်လီၤ. အဝဲသ့ၣ်​အကျါ လွံၢ်ဂၤန့ၣ် သု​ထံၣ်ဘၣ်​လၢ​တၢ်ဂီၢ်အံၤ​အပူၤ​န့ၣ်လီၤ. တဂၤန့ၣ်​မ့ၢ်ဝဲ ဒၤနံးယ့လး, ဒီး​ပှၤအဂၤ​သၢဂၤ​တခီ ပှၤဘၤဘူၤလိၣ်ဖိတဖၣ် ကိးအီၤလၢ ၡၤဒရး, မ့ၤၡး​ဒီး ဧဘ့ၤဒနကိၤ​န့ၣ်လီၤ.

နဘူၤကးန့စၢ်န့ၣ် ကူၣ်ထီၣ်ဖးလီၤဝဲဒၣ်​လၢ က​ဟ့ၣ်​သးစၢ်တဖၣ်​တၢ်မၤလိ​နၢ်ပၢၢ် ဒ်သိး​က​မၤ​အတၢ်ခ့တၢ်ပှၤ လၢ​အနူၢ်ပူၤစီၤပူၤ ကသ့အဂီၢ်​န့ၣ်လီၤ. တၢ်မၤလိ​သၢနံၣ် ဝံၤအလီၢ်ခံ လၢ​အဝဲသ့ၣ်​အကျါန့ၣ် က​ဃုထၢထီၣ်ဝဲ​ထဲဒၣ် ပှၤလၢ​အကူၣ်တၢ်ဆးတၢ်​သ့​ကတၢၢ် ဒ်သိး က​မၤစၢၤအီၤ​လၢ တၢ်​ဃု​တၢ်သဘံၣ်ဘုၣ်တဖၣ်​အစၢ န့ၣ်လီၤ. စီၤပၤ​အဲၣ်ဒိး​လၢ သးစၢ်တဖၣ်အံၤ အိၣ်ဒီး တၢ်အိၣ်ဆူၣ်အိၣ်ချ့, တၢ်ဂံၢ်ဆူၣ်ဘါဆူၣ် ဖဲ​ဘၣ်တၢ်​မၤလိ​အီၤ​ဒီကတီၢ်န့ၣ်​လီၤ. လၢတၢ်န့ၣ်အဃိ မၤလိာ်​အကုၢ်​အပှၤတဖၣ်​လၢ ကဒု​အီၣ်​သးစၢ်တဖၣ် တၢ်အီၣ်တၢ်အီ​လၢ ပှၤ​နူၢ်ပူၤစီၤပူၤတဖၣ်​အီၣ်ဝဲ​န့ၣ်လီၤ.

ကွၢ်​ပှၤသးစၢ်ဖိ ဒၤနံးယ့လးန့ၣ်​တက့ၢ်. အဝဲ​တဲဘၣ် နဘူၤကးန့စၢ်​အကုၢ်​ ပှၤပၢၤတၢ်​အခိၣ် အၤၡပနး​မနုၤလဲၣ်န့ၣ် သု​သ့ၣ်ညါဧါ. စံးဝဲဒၣ်​လၢ တအဲၣ်ဒိး​အီၣ်ဝဲဒၣ် စီၤပၤ​အတၢ်အီၣ်​လၢ အဝံၣ်သိဝံၣ်ဘဲ​တဖၣ်န့ၣ်လီၤ. ဘၣ်ဆၣ်​သနာ်က့ အၤၡပနး​တခီ သးကိၢ်ဝဲဒၣ်​လီၤ. စံးဝဲဒၣ် ‘သု​ကဘၣ်​အီၣ်​မနုၤလဲၣ်န့ၣ် စီၤပၤ​စံၣ်ညီၣ်တဲာ်ဃာ်ဝဲ​လံ. သုက့ၢ်သုဂီၤ​မ့ၢ်​တဖျါဆူၣ်ဖျါချ့​ထဲသိး သးစၢ်​အဂၤတဖၣ်​သၢပျၢၤ ယ​ကဘၣ်​တၢ်မၤ​သံ​လီၤ.’

တုၤနုၤတစု, ဒၤနံးအ့လး​ဒီး အသကိးတဖၣ် လဲၤ​ဆူ​ပှၤလၢ အၤၡပနး​ပာ်လီၤ​အီၤ​လၢ​ပှၤ​ပၢၤ​တၢ် အအိၣ် ဒီး​စံး​အီၤ​လၢ ‘မၤကွၢ်​ပှၤ​ထဲ​အသီ ၁၀ တက့ၢ်. ဟ့ၣ်ပှၤ​တၢ်ဒိးတၢ်လၣ်တဖၣ်​ဒီး ထံ​လၢ​ပ​က​အီ​အီၤန့ၣ်​တက့ၢ်. မ့ၢ်​ဝံၤဒီး ပှၤ​သူၣ်စၢ်သးဘီၣ်​လၢ အအီၣ်​စီၤပၤ​အတၢ်အီၣ်တဖၣ် ဒီး​ပဝဲ​သ့ၣ်တဖၣ်အံၤ မ့ၢ်​မတၤ​အတၢ်အိၣ်ဆူၣ်အိၣ်ချ့ ဂ့ၤဒိၣ်​တက့ၢ်​လဲၣ်​န့ၣ် ထိၣ်သတြီၤ​ကွၢ်​တက့ၢ်’ န့ၣ်လီၤ.

ပှၤ​ပၢၤ​တၢ် ဘၣ်အသး​လၢ က​မၤ​ကွၢ်ဝဲ​ဒ်န့ၣ်လီၤ. တုၤ​အသီ ၁၀ ပူၤကွံာ်န့ၣ် ဒၤနံးယ့လး​ဒီး အတံၤသကိး​သၢဂၤ အတၢ်အိၣ်ဆူၣ်အိၣ်ချ့ ဖျါလၢ​အဂ့ၤန့ၢ်ဒံး သးစၢ်​အဂၤတဖၣ်​န့ၣ်လီၤ. ထဲန့ၢ်ဒီး​ ပှၤပၢၤတၢ်​န့ၣ် ဟ့ၣ်​သးစၢ်တဖၣ်​အခွဲး​လၢ ကအီၣ်ဝဲသ့ၣ် တၢ်ဒိးတၢ်လၣ် လၢ​စီၤပၤ​အတၢ်အီၣ်​အလီၢ်​န့ၣ်လီၤ.

ယံာ်​သၢနံၣ်​ဝံၤဒီး သူၣ်ဘီၣ်​သးစၢ်​ခဲလၢာ် ဘၣ်တၢ်​ဆှၢ​အီၤ​ဆူ နဘူၤကးန့စၢ်​အမဲာ်ညါ​န့ၣ်လီၤ. စီၤပၤဒိၣ်န့ၣ် ကတိၤ​ကွၢ်​တၢ်​ဒီး အဝဲ​သ့ၣ်တဖၣ်​ဝံၤအလီၢ်ခံ သ့ၣ်ညါဝဲ​လၢ ဒၤနံးယ့လး​ဒီး အသကိး​သၢဂၤန့ၣ် အတၢ်ကူၣ်ဘၣ်ကူၣ်သ့​အဂ့ၤကတၢၢ်, အမဲအ့ၣ်ပျ့ၤသွဲး​ကတၢၢ်​န့ၣ်လီၤ. လၢတၢ်န့ၣ်အဃိ ပာ်ဝဲ​သူၣ်ဘီၣ်​သးစၢ်​သ့ၣ်အံၤ လၢ​နူၢ်ပူၤ လၢ​အကမၤစၢၤ​အီၤ​အဂီၢ်န့ၣ်လီၤ. ဖဲ​အသံကွၢ်ဝဲဒၣ် တၢ်သံကွၢ်သံဒိး မ့တမ့ၢ် တၢ်သဘံၣ်ဘုၣ်​အစၢ တဘျီ​လၢ်လၢ်​အခါ သးစၢ်ဖိတဖၣ်အံၤ သ့တၢ်ဘၣ်တၢ်​အါန့ၢ်ဒံး အပှၤလုၢ်တၢ်အခိၣ်​ဒီး ပှၤကူၣ်ဘၣ်ကူၣ်သ့တဖၣ် အစး ၁၀ န့ၣ်လီၤ.