HOMPA Nebukadenesara ta twara Vaisraeli navenye ava va lironga koBabironi. Konyima zeyi hompa ta horowora mo vagaragona woyipa yoyiwa ntani wovakotoki. Vane owo kuna kara vamati ava ono kumona apa. Gumwe kuna kara Ndaniyera, ano Vababironiya tava tumbura ava vakwawo vatatu asi oSaduraka naMesaka naAbetenego.

Nebukadenesara ana kara negano lyokudeura vagaragona yipo va rugane mombara zendi. Konyima zonomvhura ntatu dedeuro, ta horowora po wovakotoki velike va mu vatere mokukohonona po maudigu. Hompa kuna hara asi vamati va kona kukara wononkondo ntani wokukanguka mosiruwo sedeuro. Makura ta gava nompangera kovakareli vendi asi va kona kuvapa nondya donongwa novhinyu ngwendi yeeyi a gwana age nepata lyendi.

Tara Ndaniyera. Ono diva asi yinke ana kutantera erenga lyaNebukadenesara lyenene Asipenasi? Ndaniyera kuna kumutantera asi age kapi ana hara kulya nondya donongwa dokositafura sahompa. Nye Asipenasi ana kara nosinka. Ta tanta asi: ‘Hompa kuna tokora eyi mwa kona kulya nokunwa. Ano nsene kapi nomu moneka muna kanguka ngwendi vamati vakweneni, age nga dipaga nge.’

Ndaniyera makura ta zi komunomeni ogu ga tulire Asipenasi a va kunge novakwawo vatatu. Ta tanta asi: ‘Tu heteka si mazuva 10. Tu pa ehidi lyokulya nomema gokunwa. Makura ngo tu hetakanese novamati ava ava li nondya dahompa, ngo tare asi wolye ava vana kumoneka po nawa.’

Munomeni ta pura mokuyirugana eyi. Ano apa gana pu mazuva 10, Ndaniyera novakwawo vatatu tava moneka vana kanguka unene kupitakana vamati wopeke. Munomeni makura ta va sigi va twikire kulya ehidi montambo zokulya eyi ana kugava hompa.

Kouhura wonomvhura ntatu vamati navenye tava va twara kwaNebukadenesara. Konyima zokuuyunga nawo, hompa ta mono asi Ndaniyera novakwawo vatatu yiwo wovakotoki po unene. Makura ta va ninki va mu vatere mombara. Nkenye apa hompa nga pura oNdaniyera naSaduraka namesake naAbetenego mapuro ndi a va pe maudigu gomanene, awo tava yi diva poyikando 10 kupitakana vapristeli novagara vendi wonondunge.

Ndaniyera 1:1-21.