NEBUKANDESA wa ntinu onete matoko mawonso m’akwa ngangu ma Aneyisaele kuna Babele. I bosi, wasola vana bena yintoko-toko yisundidi ngangu ye miote. Tala matoko maya mama. Mosi i Daniele, atatu akaka, bayikilwanga kwa esi Babele vo Saderake, Misake yo Abedengo.

Nebukandesa, wazola vo matoko mama malongwa kimana basadila muna lumbu lwandi. Kuna mfoko a mvu ntatu osola ana besunda e ngangu mu kunsadisa mu bakanga e nzengo za mambu. O ntinu ozolele vo matoko bavonga yo kala yo vimpi wambote ekolo belongwanga. Ozevo, okanikini ntaudi zandi vo babavana madia ye vinyo ina kenuanga o ntinu y’esi nzo andi.

Tala Daniele, nga ozeye dina kevovanga kwa Asipenaze wa ntu a ntaudi za Nebukandesa? Umvovese vo kazolele dia madia mamosi yo ntinu ko. Ediadi diatokanesa Asipenaze. Umvovese vo: ‘Ntinu yandi osikidisi madia nudia ye ndua nunua. Avo ke nuvongele ko nze matoko makaka okumponda.’

Daniele ovovese selo kia Asipenaze wabavananga madia vo: ‘Tonta ntaudi zaku, do, lumbu 10. Utuvana nkovi yo maza twanua. I bosi tala ndose zeto ye ndose za yintoko-toko ina idianga madia ma ntinu. Tala kana aki nani bekala ye mpwa yambote.’

I ngwila kabawila muna diambu diadi. E lumbu 10 ova yavioka, e ndose zau zamoneka vo zasund’o wete, ke mu yintoko-toko yawonso ko. Ozevo, e selo ubayambwidi badianga e nkovi ke mu madia ma ntinu ko.

Kuna mfoko a mvu ntatu, banete matoko kwa Nebukandesa. Vava ntinu kamana mokesa yau awonso omwene vo Daniele ye akundi andi basunda e ngangu. Ozevo, bakedi muna lumbu lwa ntinu mu kunsadisa. Muna konso diambu dina kayuvwidi o ntinu, kwa Daniele, Saderake, Misake ye Abedengo kakubasolola vo basundidi nsunda 10 e nganga ye akwa ngangu muna kintinu kiandi.