Icisimicisyo 75: Abasankwa Bane mu Babiloni
IMFUMU Nebukadinesa apinta bonse abaIsilaeli abasambilile ukucilapo ku Babiloni. Panuma yafyefyo imfumu yasalululapo pali bo abasankwa abacililepo ubulombe kabili abacenjele. Bane pali bo ni baba abasankwa wabona apa. Umo ni Danyeli, kabili bambi abo batatu abaBabiloni balibelicile ati Syadilaci, Mesyaci na Abedinego.
Nebukadinesa ateyanya ukusambisya abasankwa abanice pakweba’ti bangapyunga mu cipango cakwe. Panuma ya myaka itatu iya kubasambisya akasalululamo lukoso abacenjele ati balukumofwako ukupikulula amakatasyo. Imfumu ilukufwaya abasankwa ukuba abamakosa kabili abakubula neli bulwasi ili balukubasambisya. Popele yafunda abapyugisi baiko ati balyelelwe ukubapela bonse lukoso ifyakulya fya mutundu umo wenka ifinonene ne mfaina ifi yo ne lupwa lwaiko bapoka.
Lolesya umusankwa Danyeli. Kani waisiba ifi alukulabila kuli Asipenasi icilolo ca bapyungisi bakwe Nebukadinesa? Danyeli alukumubula ati ye talukufwayapo ukulya ifintu ifinonene ukufuma kwi tebulu lya mfumu. Pano Asipenasi abombomana. Alabila ati: ‘Imfumu yapingulapo kale ifi mwebo mwakulukulya. Kabili kani tamubonekele koti ni babo bambi abasankwa, imfumu pambi ikanjipaya nebo.’
Popele Danyeli aya ku mpemba yeyo Asipenasi aikalikile pali Danyeli na pa babyakwe batatu. Alabila ati: ‘Ndukumukombeteleni ati mutwesye pa nsiku 10. Mulukutupela umusalu wa kulya ne menda akunwa. Eli mukatulinganye fwebo ne basankwa abo bambi abalukulya ifyakulya fya mfumu, ne kubona abakaboneka bwino.’
Impemba yasuminisya ukucite’fi. Kabili ili insiku 10 syasila, Danyeli ne babyakwe batatu baboneka abakosele ukucila na bonse abo bambi abasankwa abanice. Popele impemba yabaleka ati batwalilile ukulya umusalu pe punda lya fyakulya imfumu ipeela.
Panuma ili imyaka itatu yasila bonse abasankwa batwalwa kuli Nebukadinesa. Panuma ya kwambala nabo bonse, imfumu yasangana’ti Danyeli ne babyakwe batatu bacilapo ukucenjela. Popele yabalama pakweba’ti balukuyofwako mu cipango. Kabili yonse mpindi ili imfumu yaipusya ifyakwipusya kuli Danyeli, Syadilaci, Mesyaci na Abedinego neli ukubapela amakatasyo aakosele, balisi ukucilapo imiku 10 pa bapapatilisi neli abamano bakwe abalalume.
Danyeli 1:1-21.
Ifyakwipusya
- Mba nibani abasankwa bane abali mu cikope, kabili nindo babelele mu Babiloni?
- Nikwisa kwansika Nebukadinesa abakwatile abasankwa bane, kabili findo afunda abapyungisi bakwe?
- Nifisa fyakulya ne fyakunwa Danyeli alomba ati balukumupela ye ne babyakwe batatu?
- Panuma yakulya umusalu pa nsiku ikumi, Danyeli ne babyakwe batatu bapusanako syani ku basankwa bambi?
- Cindo calengele ukweba’ti Danyeli ne babyakwe batatu babe mu cipango ca mfumu, kabili nimuli yisa’nsila bacililapo pa bapapatilisi ne balalume bamano?
Ifyakwipusya na fimbi
- Pendeni Danyeli 1:1-21.
Findo twelelwe ukucita kani tulukufwayo’kucicila ukwesiwa ne kulikanya ku kucite’fibipile? (Dan. 1:8; Taŋ. 39:7, 10; Gal. 6:9)
Kani nimuli sisa’nsila abanice muli bulelo bangatunkwa neli ukupangilisiwa ukulibikamo mu fintu ifi bamo babona ati ‘fyakulya ifinonene’? (Dan. 1:8; Ifisi.20:1; 2 Kol. 6:17-7:1)
Kani icisimicisyo ca mu Baibolo icilabila pa basankwa bane abaEbeya cilatofwa ukubona syani amasambililo amu calo? (Dan. 1:20; Yisa. 54:13; 1 Kol. 3:18-20)
