Vana vaMalunga Vawana muMbavilone
Chihande 75
Vana vaMalunga Vawana muMbavilone
MWANGANA Nevukataneza hikuya navaIsalele vosena vakutanga chikuma kuMbavilone. Jino mwangana hikusakulaho vakweze vamwaza, vaunyoji. Vawana vavo, vakivo ava unakumona hano. Umwe ikiye Ndanyele, vakwavo vatatu vaka-Mbavilone vavavulukile ngwavo Shatalake, Meshake naAvete-nengo.
Nevukataneza nasake alongese vakweze ava vazatenga muzuvo yamwangana. Hakuvalongesa hamyaka yitatu, mwakasakulaho kaha vaze vaunyoji chikuma vamukafwenga kutalanga haukalu. Mwangana nasake vakweze vapwenga vakutakama nakulikangula omu vanakuvalongesa. Ngocho himwalweza vangamba jenyi kuhananga vosena ava kulya chamwaza navinyo ngana muvanakumuhananga ikiye natanga yenyi.
Achimutale mukweze Ndanyele. Unejiva ovyo anakuhanjika kuli kapitau kavangamba jaNevukataneza, Ashapenaze nyi? Ndanyele anakumulweza ngwenyi kate kulya vyakulya vyamwaza kumesa yamwangana. Oloze Ashapenaze nevu woma. Ngwenyi: ‘Mwangana namitongwela lyehi vimwatela kulya nakunwa. Nge namuhokama kuhambakana vakwenu vakweze, kaha mwangujiha.’
Shikaho Ndanyele hikuya kuli kaselwa vatongwele kuli Ashapenaze kupwa muka-kulama ikiye namasepa jenyi vatatu. Ngwenyi: ‘Achitweseke hamakumbi 10. Tuhanenunga visakwola tulyenga nameya nawa tunwenga. Jino, numba mutweseke navakweze vali nakulyanga vyamwangana, nakumona veya vanakusoloka kanawa.’
Muka-kuvalama mwetava kulinga ngocho. Omu anakumu makumbi 10, Ndanyele namasepa jenyi vatatu hinavasoloka kanawa kuhambakana vakweze vakwavo. Ngocho kaselwa mwavecha valyenganga visakwola nakufumisako kulya vavahanyine kuli mwangana.
Hakukuma chamyaka yitatu vakweze vosena hikuvatwala kuli Nevukataneza. Omu nakumisa kuhanjika navo, mwangana mwawana jino nge Ndanyele namasepa jenyi vatatu vakivo vaunyoji chikuma. Kaha himwavalama vamukafwenga muzuvo yamwangana. Kahomu mwangana mwahulisa Ndanyele, Shatalake, Meshake, naAvete-nengo vihula chipwe kuvahana ukalu waunene, vakivo vanejiva kuhambakana vapilishitu jenyi navatu vaka-mangana mapapa 10.