Babilun Ra Wahma Walhwal Ba
Sturka 75
Babilun Ra Wahma Walhwal Ba
KING Nibyukadnisar mita Israel uplika tila wina ya nani kau kul pain bri kan ba, sut Babilun ra brihwan. Ningkara, witin wahma nani kau mawan pain bara sinskira nani ba pliki brin. Naha ra wahmika walhwal bui ba kaikaia sip sma. Kum ba Danyal, bara wala yuhmpa ba, Babilun uplika nani mita Sadrak, Misak bara Abid–Negu maki kan.
Nibyukadnisar ba want kan, witin nani ra kau kul dingki king watla ra wark taki kabia dukyara. Mani yuhmpa kul dingkan ningkara, kau sinskira nani ba pliki brin, trabil nani wapnika mangki help muni kabia dukyara. Witin wahmika nani ba karna kabia want kan, baha mita, adar yaban witin ai pamalika aikuki plun pi kan bara wain di kan ba wina wahmika nani ra dakakbia.
Wahma Danyal ba ra kaiki kais. Nu sma witin Nibyukadnisar albika nani wihtka Aspinas ra, dia wi sapa? Witin king tibilka ra plun auhni nani mangkan ba wina piaia want apia wisa. Aspinas ba wari takan. Bara win: ‘King aisan, man nani ba dia piaia bara dia diaia ba. Bara man nani wahma wala nani baku batana pain apia sma kaka, sip sa ai ikaia.’
Baku bara, Aspinas mita upla kum ra witin nani pura kaikaia dukyara mangkan kan ba ra, Danyal mita wih win: ‘Yang nani ra 10 dis bilara li bara dus ma nani baman ai dakaks. Ningkara, wahma wala nani king pata wina pi ba aikuki, praki ai kaiks ya nani kau pain kaikbia sapa.’
Bara pura kakaira ba pain kaiki baku daukan, bara 10 dis luan ningkara, Danyal bara ai panika yuhmpa ba kau batana pain kaiki kan wahma wala nani ba wal, baku bara witin nani ra swin, ban dus ma nani ba pi kan, king mita plun nani yaban ba watlika ra.
Mani yuhmpa alkan bara wahmika nani sut ba king Nibyukadnisar ra brihwan. King ba witin nani ra aisan ningkara, kaikan Danyal bara ai panika yuhmpa ba kau sinskira bangwi kan. Baha mita witin nani ra king watla ra helpika baku bri kan. Bara king ba, Danyal, Sadrak, Misak bara Abid–Negu ra makabi walanka karna nani dauki kan pyua ra, witin nani ba aima 10 prais baku, kau sinskira bangwi kan, king prîstka bara sinskirka nani ba wal.
