TLAPOUALISTLI 75

Naui telpokamej okatkaj Babilonia

UEYI tekiua Nabucodonosor kinuika Babilonia israelitas akinmej okachi tlamatij. Satepan, kinpejpena telpokamej akinmej okachi kuajkualtsitsintin uan tlen okachi ixtlamatkej. Itech tlaixkopinal tikinmita naui telpokamej. Se itoka Daniel, uan oksekimej eyi telpokamej, babilonios kintokayotiaj Sadrac, Mesac uan Abednego.

Nabucodonosor okinekiaya kinmachtis pampa tekitiskiaj itech kali kanin ye otlanauatiaya. Ijkuak panoskia eyi xiuitl ijkuak kuali yokinmachtijkej, san kinpejpenaskia akinmej okachi ixtlamatkej pampa kipaleuiskiaj kiyektlaliskej seki ouijkayotl. Okinekiaya telpokamej ma chikajtokan, ik non, otlanauati ma kintlamakakan ika tlakuali uan vino tlen okinmakayaj Nabucodonosor uan ichanejkauan.

Xikita telpochtli Daniel. ¿Tikmati tlen kiluijtok Aspenaz, tlakatl akin otlayekantoka itech itekipanojkauan Nabucodonosor? Okilui amo okinekiaya kikuas tlakuali uelik tlen ueyi tekiua okinmakaya. Aspenaz omotekipacho. Okijto: ‘Ueyi tekiua yokijto moneki nantlakuaskej uan nanatliskej. Uan tla amo nanmoita chikauakej ijkon ken oksekimej telpokamej, ueyi tekiua uelis nechmiktis’.

Ik non, Daniel omotlapoui iuan tlakatl akin Aspenaz okitlali pampa kinmaluiskia Daniel uan eyi iyolikniuan uan okilui: ‘Xikchiua ijkon san itech majtlaktli tonalmej. Xitechmaka san kilitl uan atl. Ijkuakon, xitechita iuan oksekimej telpokamej tlen kikua tlakuali tlen kikua ueyi tekiua, uan xikita akin moita okachi chikajtok’.

Akin otlamaluiaya okijto ijkon kichiuaskia. Uan ijkuak opanokej majtlaktli tonalmej, Daniel uan eyi iyolikniuan omoitayaj okachi chijchikauakej amo ijkon ken oksekimej telpokamej, uan okinkauilijkej ma kikuakan tlakuali tlen yejuan okinekiayaj uan amo tlen ueyi tekiua okinmakaya.

Eyi xiuitl satepan, nochtin telpokamej okinuikakej ixpan ueyi tekiua Nabucodonosor. Satepan okintlapoui, ueyi tekiua okitak ken Daniel uan eyi iyolikniuan okatkaj okachi ixtlamatkej. Ik non, okintlali pampa ma kipaleuikan kanin ye otlanauatiaya. Uan ijkuak ueyi tekiua okintlajtlaniayaj Daniel, Sadrac, Mesac uan Abednego ken kiyektlaliskia se ouijkayotl, yejuan okachi okimatiayaj ken yetoskiaj majtlaktli teopixkamej uan amo ijkon ken teopixkamej uan ixtlamatkej tlen okitekichiuiliayaj ueyi tekiua.

Daniel 1:1-21.