KO E Patuiki ko Nepukanesa ne uta oti e ia e tau Isaraela ne mua e iloilo ki Papelonia. He mogo fakamui ne fifili he patuiki mai ia lautolu nā e tau fuata taane ne mua atu e mata mitaki mo e iloilo. Tokofā ia lautolu nei ko e tau tama taane ne kitia e koe he mena nei. Taha ko Tanielu, mo e tokotolu foki ne fakahigoa he tau Papelonia ko Sataraka, Mesako mo Apetiniko.

Ne fakatokatoka e Nepukanesa ke fakaako e tau fuata taane ke fekafekau he fale patuiki haana. Ka tolu e tau he mole e fakaako to fifili e ia a lautolu ne kua mua atu e iloilo ke lagomatai a ia ke fakatonutonu e tau lekua. Manako e patuiki ke alaga maō mo e tino malolō e tau fanau he magaaho ka fakaako ai a lautolu. Ati poaki a ia ke he tau fekafekau haana, kua lata ke age ki a lautolu oti e tau mena kai lolo mo e uaina ke tuga ne moua e ia mo e magafaoa haana.

Onoono ke he fuata ko Tanielu. Iloa nakai e koe ko e heigoa haana kua tala age ki a Asepenasa ko e takitaki fekafekau ha Nepukanesa? Kua tala age a Tanielu kua nakai manako a ia ke kai e tau mena kai lolo mai he laulau he patuiki. Ka kua tupetupe a Asepenasa. ‘Kua fitā he fifili he patuiki e tau mena kai mo e tau mena inu ha mutolu,’ he ui e ia. ‘Ti ka nakai mata malolō a mutolu tuga e falu fuata taane, liga to tamate e ia au.’

Ati fano a Tanielu ke he tagata ne fekau e Asepenasa ke leveki a ia mo e tau kapitiga tokotolu haana. ‘Fakamolemole kia kamatamata a mautolu ke he 10 e aho,’ he talahau e ia. ‘Tuku mai ki a mautolu e tau lakau kai ke kai mo e vai ke inu. Ti fakatatai a mautolu mo e falu fuata taane ne kai he tau mena kai he patuiki, mo e kitia ko hai ne mua e mata mitaki.’

Ne talia he tagata leveki ke taute e mena nei. Ti hoko ke he 10 e aho, ne mua atu e tino malolō ha Tanielu mo e tau kapitiga tokotolu haana ka fakatatai ke he falu fuata taane. Ti fakaatā ai he tagata leveki a lautolu ke matutaki ke kai e tau lakau kai ka e toka e tau mena ne foaki he patuiki.

He tolu e tau he mole, ne ta atu e tau fuata taane oti ki a Nepukanesa. Oti ai e tutala ki a lautolu oti, ne kitia he patuiki kua mua e iloilo ha Tanielu mo e tau kapitiga tokotolu haana. Ti toka e ia a lautolu ke lagomatai a ia he fale patuiki. He magaaho ka hūhū e patuiki ki a Tanielu, Sataraka, Mesako mo Apetiniko e tau hūhū po ke age e lekua vihi lahi ki a lautolu, ne fakalahi 10 e mena ha lautolu ne iloa atu ke he tau ekepoa mo e tau tagata iloilo haana.