OHAMBA Nambukondonosole ankho watyindile Ovaisilayeli aveho vokuatanga nawa, evetuala ko Mbambilonia. Iya ohamba aholovonapo ovakuendye vana ankho ovawa unene, novanongo. Ovakuendye vamue vekuana, ovava weete polutalatu apa. Umue utiwa o Daniele. Ovakuavo valukwa omanyina oko Mbambilonia Sadrake, na Mesake na Abedeneku.

Nambukodonosole ankho wasokele okulongesa ovakuendye ovo, opo vaundape mombala yae. Iya tyina papita omanima etatu, na aholovonepo vala ovanongo unene, opo vemukuateseko okutetulula ovitateka. Mokuenda kuelongeso ohamba ankho uhanda ovakuendye vakale nekongoko no kuapama. Moluotyo, watuma ovaundapi vae, vevepe aveho okulia kuna ohamba nombunga yae ankho valia, no vinyu.

Tala Daniele. Ove utyii oityi ekahi nokupopila Aspenas, onkhalamutue yovaundapi va Nambukondonosole? Daniele ukahi nokumutolela okuti, kahande okulia ovipuka oviwa vitunda komesa yo hamba. Mahi, Aspenas ankho wasukalala. Iya ati: ‘Ohamba watokola oityi onue muna yokulia nokunwa. Inkha kamukala nekongoko ngo vakuendye vakuenyi, ohamba ipondola okundyipaa.’

Daniele apopila omulume una watumua na Aspenas opo eveyunge, ati: ‘Mbambavo, hetekela vala ononthiki 10 okutuavela onombi, nomakovi, nomalupoyu atyiho tyomepia vala. Iya okunwa tuavele vala omeva. Konyima yononthiki ombo, otueleka novakuendye vana vekahi nokulia ovikulia viohamba. Otale ovalie vekahi vali nawa.’

Omulume oo etavela. Etyi papita ononthiki 10, Daniele nomapanga ae etatu, vakongoka vali tyipona ovakuendye ovakuavo. Moluotyo, omulume oo watualako nokuvepa onombi nomakovi, aviho viomepia. Eheveavela vali ovikulia viohamba.

Konyima yomanima etatu, ovakuendye aveho avevetuala ku Nambukondonosole. Etyi atomphola navo aveho, ohamba wamona okuti Daniele nomapanga ae etatu, ankho ovanongo vali. Moluotyo, ohamba evepe ovilinga vio kumukuatesako mombala. Tyina ohamba ankho apula Daniele, na Sadrake, na Mesake na Abedeneku, ine o putyina eveavela ovitateka viatena, ankho vetyivila vali unene, tyipona ono saserdote mbo hamba no vanongo vae.