KJENNICH Nebukadnezar neem aule huach utjelieede Israeliten met no Babielon. Von dee läsd de Kjennich sikj dan de kjlieekjste un schmokste Junges ut. De vea Junges opp dit Bilt worden uk utjewält. Eena von dee heet Daniel, un de aundre nanden de Babielonia Schadrach, Meschach un Abed-Nego.

Nebukadnezar wull de Junges loten utlieren toom en sienen Paulaust deenen. Wan de Junges ieescht dree Joa jelieet hauden, wudd hee de kjlieekjste von dee to siene Rotjäwasch moaken. De Kjennich wull haben, de Junges sullen jesunt un stoakj sennen. Doawäajen säd hee to siene Deena, see sullen de Junges krakjt daut scheene Äten uk dän Wien jäwen, waut hee un siene Famielje kjrieejen.

Kjikj mol opp daut Bilt. Daniel rät hia jroz met Aschpenas, dän Väaschten von Nebukadnezar siene Deena. Weetst du, waut Daniel to dän säd? Hee säd, hee wull daut scheene Äten vom Kjennich nich. Oba Aschpenas muak daut Sorjen un hee säd: ‘De Kjennich haft daut väajesajcht, waut jie äten un drinkjen sellen. Un wan junt nich soo jesunt lat aus de aundre Junges, woat dee mie woomäajlich dootmoaken.’

Soo jinkj Daniel no dän Oppsechta, dän Aschpenas äwa am un siene dree Frind aunjestalt haud, un säd to dän: ‘Moak toom Jefaulen fa tieen Doag eene Proow met ons. Jeff ons bloos Jreens to äten un Wota to drinkjen. Un dan see, wäm bäta lat, ons ooda de Junges, waut von dän Kjennich sien Äten kjrieen.’

De Oppsechta deed daut dan. Aus de tieen Doag ieescht derch wieren, leet Daniel un siene dree Frind bäta aus aule aundre Junges. Un soo leet de Oppsechta an uk fa wieda Jreens äten enne Städ daut Äten vom Kjennich.

Aus de dree Joa äwa wieren, worden aul de junge Mana no Nebukadnezar jebrocht. De Kjennich räd dan met jiedren eenen un moakjt, daut Daniel un siene dree Frind de kjlieekjste wieren. Soo behilt hee an aus siene Helpa em Paulaust. Un jiedatsmol, wan de Kjennich eene Froag haud ooda en eene schwieeje Sach eenen Rot brukt, wisten Daniel, Schadrach, Meschach un Abed-Nego tieen Mol mea aus aul siene Priestasch un kluake Mana.