KING Neb·u·chad·nezʹzar hem tekem evri Israelite wea skul gud for go long Babylon. Bihaen, king hem chusim olketa wea kleva and luk naes from midolwan long olketa. Fofala long olketa nao iu savve lukim long hia. Wanfala hem Daniel, and nara thrifala olketa long Babylon kolem olketa Shaʹdrach, Meʹshach and A·bedʹne·go.

Neb·u·chad·nezʹzar plan for trainim olketa young man for serve long haos bilong hem. Bihaen long thrifala year wea olketa kasem training, hem bae chusim nomoa olketa wea barava kleva for helpem hem stretem olketa problem. King hem wantem olketa boy for strong and healthy taem olketa kasem training. So hem talem olketa servant bilong hem for givim olketa semkaen spesol kaikai and wine wea olketa givim long hem and famili bilong hem.

Lukim Daniel. Waswe, iu savve wanem nao hem talem long Ashʹpe·naz wea hem chief servant bilong Neb·u·chad·nezʹzar? Daniel talem hem hao hem no want for kaikaim olketa spesol samting from tebol bilong king. Bat Ashʹpe·naz hem wari. Hem sei: ‘King hem disaedem finis samting wea iufala bae kaikaim and drinkim, and sapos iufala no luk healthy olsem olketa narafala young man, maet hem killim mi dae.’

So Daniel go long man wea Ashʹpe·naz markem for lukaftarem hem and thrifala fren bilong hem. Hem sei: ‘Plis testim mifala for 10-fala day. Givim mifala samfala vegetable for kaikaim and wata for drinkim. Then markem mifala witim olketa nara man wea kaikaim kaikai bilong king, and lukim hu nao hem luk gud.’

Man hia hem agree for duim diswan. And long mek-10 day, Daniel and thrifala fren bilong hem olketa luk moa healthy winim evri narafala young man. So man hia hem letem olketa for gohed kaikaim vegetable and no kaikai wea king hem givim.

Long end bilong thrifala year evri young man go front long Neb·u·chad·nezʹzar. Bihaen hem story long each wan, king hem lukim hao Daniel and thrifala fren bilong hem nao olketa barava kleva tumas. So hem keepim olketa for helpem hem long bigfala haos bilong hem. And taem king hem askem Daniel, Shaʹdrach, Meʹshach and A·bedʹne·go olketa kwestin or talem olketa hardfala problem, olketa savve long staka samting winim eni priest or wisefala man bilong hem.